Ki dkhot ka ECC Elaka Sutnga deilang waka chnong Lelad, EJH da lai ki wow pait ya ka karkhana Coke kawa tip kam ka North East Carbon Industries kawa em hei thaw wa tip kam i Liar Pynthor Shlep kawa dang haap hapoh ka Elaka Sutnga neidaw wa da ood kiwa chong chnong wa da joor ware i pynmih tdem iwa da ktah joor ya ki kam kiwa chong chnong.
Neiliang ka ECC da chem ko wa wot ka NOC wa da e da ka JHADC toh kawa da kut kawa da hap wow pynthymme man-u-snem heiwa kani ka NOC wa da e toh ha ka 19-03-21 wei ym em bood kani ka karkhana ya kawi leh ka kyndon wa da booh ha kani ka NOC.
U Reading War, Legal Adviser ka ECC da ong u wa kani ka karkhana kawa da toh u booh ha Mynsngad, West Jaiñtia Hills tangwa da booh ya ka cheini wei u tre toh uwa na Rajasthan wa uwi na West Khasi Hills.
Da ong u leh wa ya ka NOC wow booh ya kani ka karkhana da e khlem da tip ka chnong lane khlem da pynman dorbar chnong wei da kyntu u leh ya kiwa chong chnong wow lai ujor cha ka JHADC wym toh u pynthymme ya ka NOC khlem da yoh bor chwa na ka chnong.
Da kdaw u leh wa kani ka karkhana hanla da yoh ko ya ka Consent To Establish (CTE) yow chna ya kani ka karkhana, tangwa ym em yoh ko ya ka NOC na u Chief Inspector of Boilers & Factories chwa wow sdang yei krehkaam katkam ki kyndon ka CTE. Wei kani ka CTE toh kawa krehkaam hadooh ka 30-04-22.
Chooh chooh da ong u wa katkam ka hukum ka NGT waroh ki karkhana kiwa da yoh bor toh u bood ki ya ka kyndon wa da pynmih da ka Meghalaya State Pollution Board ha ka 23-12-2020 iwa kani ka karkhana ym em bood ko, kamtæ da dawa na ka sorkar wow khang noh ya kani ka karkhana.
Neiliang kiwa chong chnong da ong ki hei miet ym ye de u chah yei sma wa mih na kani ka karkhana hadooh waroh iwa da thung da rep leh da yap lut, kamtæ ki leh kam ka chnong da dawa ki wow khang noh ya kani ka karkhana kawa da pynmih dusmon yei tdem.
