Ki dkhot ka Environment Coordination Committee (ECC) Elaka Sutnga da lai dawa ki na u DC ka East Jaiñtia Hills District ynnin ka sngi yow pynkrehkaam noh ya ka hukom ka NGT kawa da pynmih ha ka 8 tarik uni u bnai heiyatoh wa ki Coke Plant ki wym bood ya ki kyndon wei kiwa krehkaam pyrchah aiñ.
Neiliang ka ECC da ong ki wa katkam ka hukum ka NGT, da kdaw che wa kiwon kiwon ki Coke Plant kiwa krehkaam pyrchah ki kyndon aiñ kiwa da pynmih da ka Meghalaya State Pollution Control Board (MSPCB) toh da krehkaam ki pyrchah yei hok manbru long bru waroh kiwa em hapoh Meghalaya kamjooh kiwon kiwon kiwa psiah chapoh ka jylla Meghalaya.
Kamtæ ka ECC da ong ko wa waroh ki Coke Plant wa em hapoh ka Elaka Sutnga toh u khang noh ki chisyndon wei lada ki bor District kamjooh ka sorkar jylla ym leh ko iyi iyi yeini daw lai pyntip ki cha ka NGT.
Ha kani ka lai yachem wa u SP da emlang leh kiwa chong chnong kiwa da chah ktah nei em kini ki karkhana Coke kam na Umtyra heiwa kawi ka manbei da pyntip ko wa kam kawa sah hajan kini ki karkhana ym ye de tang u riñ mynsien neidaw wa sma ware i tdem, i yung leh hap bait u khang, ki um leh da sma wot hadooh ka umslap leh ym nood de u pynemkaam.
Da ong ko wa hanla da em ka hukum ka NGT, i tei i chna i pynheh ya ka karkhana dang pteiñ i wei i tdem leh dang joor wa pynmih wei ki jhoor waroh kiwa da thung leh da yap lut wei thiah i dem leh da dooh lut.
Neiliang uwa chong chnong ka Narwan da ong u wa u soh ka chnong toh uwa pawnaam bha tangwa katni da duna i mih u wei da chynna leh wa da ktah ko wot ya u phlang u rnem.
Neiliang u DC da paan por u wow e laad ya oo kattu katni sngi yow leh yeiwa emkaam.
Puræ leh: Ym toh u yada ka sorkar ya ki Coke Factory wa tyngkheiñ aiñ: NGT
