Ka East Jaiñtia Hills District Mahila Congress Committee da dap ko dei sñiawsih wa i joo ki umkhmat hadien i jia wa sñiawsih yaka khynnah kynthai ka (L) Ebamon Siangshai,deiwa ong wa ini i jia da ktah ko hadooh kattæ kattæ ya ka imlang sahlang wei da pynchong sier ko ya ki kynthai ki khynnah wei ym toh leh i jia wa nyngkong wei iwa da dep jia ma jia.
Ka Mahila Congress da ong ko wa chimkhia ko ya ini i jiwa wei ym elaad wa kiwa pynyap ya kani ka khynnah skur wow chong suk ki wei da dawa na ki bor yong ka aiñ wow kdong ya kiwa leh ya ki kaam wymman.
Da beiñ joor leh ya kiwa pynyap ya ka Ebamon Siangshai kawa toh u yoh yei hok yong ka, da dawa leh wa neiliang ka aiñ wow kitkhia wei wow leh yeiwa emkaam yow thooh ya kiwa pynyap wut wut khlem da boohteiñ.
“Ka aiñ ym toh wow yoh sñiaw du ha ki kot puræ tangwa heiyong sakhiat leh toh wow yoo yei krehkaam ko,” da ong ka Mahila Congress deiwa pynrap wa dawa ki leh na uwa mihkhmat yong kani ka thaaiñ uwa man leh u Montri ka sorkar jylla wa toh u chimkhia ya kani ka kaam wow takit ya ini wa jia wa sñiawsih. Da dawa leh na ka sorkar jylla wow pynchitom ya kiwa pynyap ya ka Ebamon Siangshai wei wow leh katkam ka aiñ Section 302 (IPC).
Da dawa leh wa ya uwa pynyap wow pynchitom deiwa pynyap lane deiwa kset waroh chirta.
