Ka seiñ East Jaiñtia Mineral Supplier Export Import Association (EJMSEIA) lyngba u President, u Wanshwa Nongtdu da lai booddien ko yei dawa booh yung krehkaam District Forest Officer (DFO) hapoh ka East Jaiñtia Hills District ynnin deiwa yachem wa u Montri sorkar deilang wa ki sahep sorkar ka chnat khloo.
Ka seiñ da yoh ko wow yachem wa u Secretary wa pait ya ka chnat khloo, u Dr. Manjunatha C uwa da pynsñiaw yei sñiawkmen chiboon wow yoh pdiang ya kam ini i pynsñiaw ki paidbah wei da kular u leh wa katwa ye yow pyndep yei kwah ki paidbah ka East Jaiñtia Hills, neibhah ka District man ko kawa da biang pura wow yoh ya ka yung krehkaam u DFO.
Ka seiñ da yoh ko wow yachem leh wa u Montri ka chnat Social Welfare, Revenue & Disaster Management, u Kyrmen Shylla wei da phylla wa u Montri ym kynmoo u wa ka East Jaiñtia toh kawa ye bha u pynyoh dan ya ka sorkar tangwa deiwa sñiawthooh ya ini da rai u wow booddien ryngkat wa ka Association ya ini i kaam khnang wow pynsuk ya ki nong East Jaiñtia wow lai e ya ki kot ki sla cha ka chnat khloo khamtam hawa yatoh wow tih moo, tih chyiap kiwa tip kam ki Minor Minerals, u booh ya ki Stone Crusher, Petrol Pump wa kiwi de kiwa emkaam yoh bor na ka chnat kawa e ya ka Forest Clearance Certificate iwa daw pynsuk leh chiboon lada em kani ka yung krehkaam hapoh ka District.
Chooh chooh da ong wa ini daw pynchlur ko leh ya ki kaam khayi deiwa pynbiang ya ki kot ki sla manda em kani ka yung krehkaam, kamtæ da kyrmen wa ini daw mankaam ko hapoh kani ka sorkar wa yahkhmat da ka NPP.
