Ka seiñ EJNC Khliehriat Circle ynnin ka sngi da lai yachem ko ya u Deputy Commissioner ka East Jaintia Hills, u A. Baranwal (IAS) hajrong kiwa boon ki phang neibynta u wanrah ya ka roi ka paar hapoh ka District.
Ka seiñ da ong ko wa ka District toh kawa chah ieh khonswet nadooh ka sorkar warim hadooh kawa katni hawa saam ya ki Scheme waphær waphær hawa nujor wa kiwi ki District nadooh ki sarok-bah hadooh ki sarok nongkyndong, ki Scheme Agriculture, Horticulture hadooh ki Scheme pynroi ya kiwa ri mrad khamtam hawa e sumaar.
Da kdaw leh wa em kiwa da dep em pyrtuid (Register) hapoh ka Meghalaya Basin Development Authority lyngba ki Society neibynta wow pynkrehkaam nadooh ki kaam ri mrad wa ki kaam rep wym yoh ki yei myntoi wei da leh arsap wei multop ka sorkar wym pynlait de ya ki Scheme yarap hadooh katni.
Wei ini da man ko mar dei khangtleiñ yei thmu wow yarap ya kiwa kwah wow yieñ hei kjat yong ki hi. Kamtæ ka seiñ da kyrpaad ko ya u DC wow sñiawbha wow pyntip cha ka sorkar khnang wow pynlait noh ya ka Scheme.
Neiliang u DC da kular u wow leh yeiwa emkaam neibynta i bha i miat yong ka District hi waroh kawi.
