Ka East Jaiñtia National Council EJNC-Khliehmyntriang Unit hapoh i yahkhmat u President u Lektor S Dkhar wa ki dkhot da yachem ki ya u Executive Engineer ka MeECL hajrong ka yurim wow dawa wow kær soodong ya u Transformer uwa em hapoh ka chnong Khliehmyntriang.
Ka seiñ da ong ko wa uni u Transformer toh uwa em hapyrdi ki sarok chnong wa hajan u sarok lai kjat wei teiñ teiñ uni u Transformer leh jooh kop diñ u wei da booh u hei ma chiboon ya ki paidbah wa chong chnong wa khamtam ya ki khynnah kiwa lai luti man-ka-sngi najan uni u Transformer wei ym kwah wow em iwon iwon i jia wa sñiawsih.
Neiliang u Executive Engineer yong ka MeECL, u H. Iakai da kular u wow leh ya ini wa dawa wa bha yong ka seiñ wei da kular u leh wow kheiñ hadooh katwon u lut wow kær ya uni u Transformer khnang wow chngaaiñ ki paidbah wa chong chnong.
Heijooh i por, ka EJNC da kyntu ko leh ya u Executive Engineer wa toh u kylliang thymme ya waroh ki chrot bordiñ kiwa da kheiñ kiwa da sap sarah hapoh ka chnong Jalyiah waroh kawi heiwa u Engineer da ong u wa ki da dep ki wow kylliang ya ar tylli ki chrot ha ka 7 tarik uni u bnai tangwa ka seiñ da ong ko wa da kylliang ya ar tylli tangwa ym pu biang wa kylliang du harood sarok tangwa ki thaw wa cha kdong ym pu dep, heiwa u Executive Engineer da jubab u wa daw kylliang won ha kini ki sngi ki bnai wow wan.
