Ka East Jaiñtia National Council (EJNC) da dawa ko wa toh u kem ya waroh ki bru kiwa emkti ha i kaam tih mooyong pyrchah yaka aiñ ha Deiñshalalu (iwa da wanrah yei yap yong ki 6 ngut kiwa mylla), wa kynthup ya u tre thaw u Lar Bareh wa ki tre paar mooyong uwa man u payu waheh yong u Montri sorkar, u Bishon Shylla wa u Tiewli Shadap kiwa emyatoh wa ki bru wa em ha i bor.
Hawa klam wa ki laad pathai khubor ha Shillong, u President ja EJNC, u Sambormi Lyngdoh da kylli u ya ki bor ka aiñ kiwa kem du ya kiwa khian katwa ya ki tre yong ka paar mooyong wa u tre thaw ym em kem yaki neibhah wa emyatoh ki wa ki bru wa em ha i bor. Da pyntip u wa ki 17 ngut ki bru wa da chah rah ha ki pulit wow chah takit toh du ki Manager wa kiwa mylla, deiwa ong leh wa lada ki tre paar ym e kaam ki, kitai ki bru wa da khlaad ym lai kreh hi ki.
Da ong u wa katkam wa klam u Montri Kaam Pohyung, katai ka thaw toh yong u Lar Bareh, tangwa sñiaw lyngngoh toh wa kammon u Lahkmen Rymbui ong won u wa u tre ym tip u iyi iyi leh hajrong itai i tih mooyong pyrchah yaka aiñ wot hawa i thlu wa tih ya u mooyong da yillu i palat 100 Meter.
U Sambormi da pyntip u leh wa katkam wa pyntip ki baar jylla wa emyatoh wa kiwa khlaad, katai ka paar mooyong ha Deiñshalalu toh i yong u Tiewli Shadap wa u Bishon Shylla uwa man u payu tre yong u Montri ka sorkar MDA.
Da ong u wa iwa sñiawlyngngoh toh wa ha i jia wa 2 snem nachwa ha Ksan, du hapoh chi tayaw da kem ya ki bru wa emkti, nadooh kiwa pynkreh wa ki tre paar, katwa katni ki bru wa chah suba ym em da leh iyi iyi neibhah wa ki emkti ki wa ki bru wa em ha i bor.
Da ong u wa ileh ka sorkar MDA ka murieh ko yei pyrtuid yong ki bru wa emkti ha katai ka kaam pyrchah yaka aiñ, deiwa kylli leh wa lada ka aiñ toh du neibynta kiwa khian wa nai? Da kylli u leh wa kammon u tre thaw ym tip u ya ki bru kiwa pynkreh ya ka paar wei ini toh iwa ym ye u pdiang, deiwa ong chooh chooh wa iyi leh ki pulit hawa tip ki wa u tre thaw toh u Lar Bareh.
Uwa yahkhmat ka EJNC da ong u wa lada u Rymbui toh sakhiat u bru wa chlur kamwa da kam u, toh u pynemkaam hok yei bor wei wow phah kem syndon ya kiwa pynkrehkaam pyrchah yaka aiñ ha katai ka paar, kitæ u Bishon Shylla wa u Tiewli Shadap kamwa da yoh yutip da ka seiñ.
U Sambormi da ong u wa lada ka aiñ man ko kawa salonsar ya waroh, toh u kem nadooh u tre thaw wa ya kitu kiwa pynkreh yaka paar.
Hawa kylli, da ong u wa ka seiñ hadooh katni ka dang chaniah ko yei takit ka sorkar, tangwa lada ym leh ko iyi iyi leh ya ki bru wa emkti, ka seiñ ym yohsa ko wow ujor daka FIR pyrchah ki bru wa emkti ha katai ka kaam pyrchah aiñ.
