Jowai: Ka East Jaiñtia National Council (EJNC) haka General Executive Council (GEC) kawa pynman ha ka 30 tarik u bnai wa da dep da rai wow kynmoo warom ya ka lyngkhooh sngi yap wa 156 yong u Woh Kiang Nangbah ha ka 29-12-2018 neidaw waka 30 tarik hap ko ha ka sngi Bibar wei daw pynman ya ka Marathon ha i step, hadien ini daw em ka Essay Writing Competition chaphang u ‘Khlawait ka Ri’ wa ka yakob droma chaphang u Kiang Nangbah.
Ka seiñ da ong ko wa da chim ya ka rai heiyatoh wa i angnood ka seiñ wow wanrah sa kawi ka C&RD Block cha ki thaaiñ Narpuh, wei wow pynku kyrdan yaka Khliehriat CHC cha ka Civil Hospital, ka GEC da rai ko leh wow thoh cha u montri ka chnat Health wa cha u montri ka C&RD.
Ka GEC da rai ko leh wow thoh cha u CEM ka JHADC wow dawa pynsangeh chwa ya i e Trading License, TCC wa kiwi kiwi iwa emkaam yong ki baar jylla kiwa kwah wow wan kreh chapoh ri-loom Jaintia, wei wow dawa leh wow pynman noh daka Joint Inspection hapyrdi ka seiñ wa ki Enforcement yong ka JHADC yow khynra ya ki kot ki sla yong ki dukan ki baar jylla wa ka Labour License kiwa kreh yong ki, wei wow e buit ya ka JHADC wow phah booh wa kreh noh da ki tre jylla ha ki thaw wa seiñ khih ki baar jylla.
Discussion about this post