Ki heh ka FKJGP ynne da yachem ki ya u Chairman ka Meghalaya Public Service Commission, u Paul Reader Marwein wow pynsmat noh u thung kreh ha ki chnat sorkar waphær waphær kiwa dang lait.
Hadien wa yachem wa u Chairman ka MPSC, neiliang u President ka FKJGP u Dundee Cliff Khongsit da ong u wa i slem wow thung kreh sorkar toh neidaw wa em palat 20,000 ngut kiwa pyndap kreh neibynta ki 4-5 kreh.
Neiliang ka seiñ won da tyrwa ko ya ka sorkar wow chna noh ya ka Information Technology (IT) Cell wow pynsmat yei rukom thap pyrtuid namo i Submit Form.
U President ka FKJGP da ong u wa ka rukom kreh wa katni wow thap pyrtuid hawa yaleh kreh ha yung krehkaam ka MPSC man i iwa slem wa iwa ym myntoi iwa pynslem bha yei kaam.
U Khongsit da pyntip u leh wa da tyrwa ha u Chairman wow em i riñ dur (Video Recording) yong ki Interview wow pynhun mynsien ya kiwa yaleh kreh.
Da ong u wa u Chairman ka MPSC da kular u leh wow riñ dur ya ki Interview khnang wow pyntikna wa em i khooid ha i yaleh kreh.
Heijooh i por uni u heh ka seiñ da ong u wa i thung kreh ha ka MPSC da sahteiñ i nadooh u 2019 neidaw ka khlam COVID-19 wei da khana u wa ka Commission ym em laad ko wow khut pyndap kreh neidaw wa hap bood ya ki kyndon yada namo ki SOP u COVID-19.
U Khongsit da ong u wa neiliang u Chairman da pyntip u wa da pynsmat bha wow pynman ya ki Written Test wa ki Interview yoh ki kreh wa lait kam ha u bnai Duyatra (Jan) wa u Thohlakhmi (Feb) uni u snem.
Chooh chooh u Chairman da khana u ya ka seiñ wa ymye wow leh yeiwa emkaam neidaw wa phah ka Kasari wow em noh ka Roster System.
Da ong u leh wa ka Commission dang yang ko ya ki chnat sorkar wow pyntip ya ki kreh wa lait katkam ka Roster System wa da pdiang da ka dhab ki Montri ka sorkar wow pynkrehkaam katkam ka Reservation Policy ha Meghalaya.
U Khongsit da ong u leh wa da yoh chiboon ki ujor wa em i chah chiliang hawa thung kreh ka MPSC yeiwa u Chairman ka MPSC da kyntait u.
Heijooh i por da beiñ joor u ya u Montri Rangbah ka jylla, u Conrad K. Sangma uwa ym pynkrehkaam ya ka State Employment Policy, yow pyntikna wa em bhah ki kreh neibynta kiwa chong chnong ka jylla ha ki yung krehkaam ki Company ki bru samen deiwa pynrap wa yoosar kamwa sarom u Montri Rangbah wow klam hajrong ini i kaam.
Da kdaw u leh ya ka Industrial Policy 2007 heiwa da klam wa ki karkhana hapoh ka jylla toh u yoh kreh ki 80% ki bru ka jylla ha ki kyrdan khian namo Unskilled Labour wei sñiawthooh hi wa lad ki Bank wa ki Telecom Company lait ki na kini ki kyndon tangwa kiwi ki karkhana wa e kreh ym toh u lait ki na kani ka Policy.
