Ka FKJGP East Jaiñtia Hills District Khliehriat da yachem ki ya u Member Secretary ka Meghalaya State Pollution Control Board, Shillong hajrong ka Public Hearing wa khut pynman da u Deputy Commissioner, East Jaiñtia Hills District Khliehriat u E. Kharmalki ha ka 21 tarik uni u bnai ha pchem ya ka yung krehkaam yong oo.
Ka seiñ da dawa ko syndon na u Member Secretary ka Board wow pyndam ya katai ka Public Hearing neibhah wa lai lait ko ya ki kyndon ka NGT heiwa ya ka Public Hearing toh u pynman hapoh u pood u ang i thaw wa toh u tih ya utai u moochuni wow e laad ya ki paidbah wow pynsñiaw ya i sur yong ki.
Katkam ka Notice da che wa ya katai ka yalang paidbah u pdiang du 100 ngut ki bru wei lada man kamni cheiwon itæ ka ri synchaar paidbah (Democracy) ong ka seiñ, wei lada ka sorkar burom sakhiat ko ya ki paidbah toh u pyndam syndon ko ya katai ka Public Hearing neibhah wa ki paidbah ym yohlaad ki wow pynsñiaw yei sur yong ki. Ka sorkar toh u sñiawthooh ko wa ki paidbah ym pu ye wow pdiang ya i thmu ka M/S Star Cement Meghalaya Ltd wow tih moochuni na Brichyrnot kamwa da yoo wa ki paidbah da pyrchah ki ha ki por wa da dep wow pynman yaka Public Hearing.
U Member Secretary da pynche u ha ka seiñ wa katai ka Public Hearing ha pchem u DC ym toh wa da e bor da ka chnat tangwa da chaniah ha oo wow jied thaw wow pynman ya katai ka yalang paidbah. Da kular u yaka seiñ wa daw thoh u cha u DC ka East Jaiñtia Hills District Khliehriat hajrong ka chithi ka seiñ wei da kular u leh wow phah Copy cha ka chnat Ministry of Environment, Forest and Climate Change wow chimkhia hajrong ini i kaam wei daw phah leh cha ka seiñ kamjooh.
Ka seiñ da ong ko wa lada ki bor wa toh u pait yaka rymaw wa u DC ym chimkhia hajrong i dawa, ka seiñ ym yohsa ko wow chim da kiwi ki luti neibynta wow pynyoh ya i hok u paidbah. Kamtæ ka seiñ daw lai yachem ko leh markhmat wa u DC yow pynsñiaw yei pyrchah wow dawa pyndam chi syndon ya i thmu wow pynman ya katai ka yalang ha pchem yong oo.
