Dawa ka HITO wa ki paar moochuni wa em ha Jaiñtia Hills wow pynyieñ Signboard ki yow pynyoo wa em Mining Lease

Ka Hynniewtrep Integrated Territorial Organisation (HITO) Jaintia Hills hapoh i yahkhmat u President, u Burom Dkhar wa kiwi, ha ka 17 tarik uni u bnai da e dorkhat ko ha u Divisional Forest Officer ka Jaintia Hills Division yow dawa wa waroh ki paar moochuni wa em ya ki Mining Lease toh u pynyieñ Signboard ki katkam ki kyndon yong ka Meghalaya Minor Minerals Concession Rules 2016 khnang yow suk u tipmit ya ki paar wa em License wa kiwa pynkreh pyrchah aiñ.

Ka seiñ da chim ko ya kani ka luti hadien wa yoh ko ya ki kot ki sla lyngba ka Right to Information Act, 2005 na ka Office yong u DFO heiwa da yoh jubab wa em du 35 tylli ki Mining Lease ha East Jaiñtia Hills wei 18 tylli ha West Jaiñtia Hills District kiwa da krehkam katkam ki kyndon aiñ.

Tangwa ka seiñ da ong ko wa hei chem ko da em da ki spah tylli ki paar moochuni kiwa pynkrehkaam khlem ki Mining Lease iwa man pyrchah yaka MMMCR 2016.

Kamtæ neiliang ka seiñ da e por ko 15 sngi ya ka Office u DFO wow hukum ya ki tre paar u leh ki yeiwa emkaam katkam ki kyndon.