U General Secretary yong ka HNYF-Eastern Region, u Damechwa Syrti da lai yachem u wa u Deputy Commissioner ka East Jaiñtia Hills District, Khliehriat yow dawa na u DC wow kær Railing ya ka Footpath ha waroh tymbud u surok wa em ha Khliehriat, itæ nadooh Petrol Pump Khliehriat East hadooh Petrol Dkhiah East.
Ya ini da dawa yow lait ki paidbah nei maa khamtam ya ki khynnah skur wa lai skur wa pynemkaam ya kani ka luti lai kjat, chooh chooh da ong leh wa iwa maa dooh toh wa em ki paidbah wa dai jhoor, dai soh ha kani ka Footpath, neitæ i daw da pynman ya kani ka thaw wow man noh ko kawa khian wow lai kjat khamtam ha ka sngi Iaw Pynkat kawa man ka sngi yaw Khliehriat.
Da ong wa ha ka sngi yaw da man sakhiat ka Footpath kawa khynnia neidaw wa boon kiwa lai yaw lai haat. Kamtæ neiliang ka seiñ HNYF da dawa ko na u DC wow sñiawbha u wow phah ya ki bru yong oo wow kær smat da ka Railing khnang yow lait ki paidbah na i maa i mynsoo.
