Ka Hynniewtrep Youth Council (HYC)-East Jaiñtia Hills Circle, ha i yahkhmat u Vice President ka seiñ u Michal Chyrmang wa ki dkhot, da lai ki wow booh da ka dorkhat ha u EE PWD Roads kawa yatoh wow pynchna ya u surok wa da oor.
Uni u sarok toh uwa lai cha Bri Sumer Jalaphet, Moolait, Samasi, Mynthlu, Pala, Umkyrpong wa kiwi de ki chnong, uwa em hajan ka chnong Sutnga, East Jaiñtia Hills District hajan ka yingkieñ Sarbang Jalaphet, kamwa man kattæ uni u sarok da booh u hei maa yei lai i wan lyngba utai u sarok neibhah wa i oor yong uni u sarok toh iwa joor bha.
Ini i oor uni u sarok toh nadooh u snem wa da dep neidaw wa joor palat u slap.
Hawa lai pait ya uni u sarok, neiliang ka seiñ da chem ko wa da sdang yei chna tangwa man ko iwa suki ware kamtæ da kyntu yaka chnat PWD wow pyndep chna ya uni u sarok chwa u sdang i por lyiur lym kamtæ uni u sarok daw oor biang u.
Chooh chooh da chem wa katni uni u sarok da hoi u lai du chiliang donhi ki kari neidaw wa da haap chi bhah uni u sarok wei lada pynslem u chna daw oor lut u waroh.
Kamtæ neiliang ka seiñ da dawa joor ko naka chnat PWD kamjooh na u MLA ka thaaiñ u Shitlang Pale wow pait lang ya ini i eh khnang wa iwon iwon i jia wa sñiawsih ym jia i.
