Ka HYC-East Jaiñtia Hills District, ynne da phah chithi ko lyngba u DC ka East Jaiñtia Hills cha ka Meghalaya State Pollution Control Board (MSPCB) yow pynsñiaw yei pyrchah joor yei thmu pynman ya ka Public Hearing ha ka 18 tarik uni u bnai neibynta wow sdang ya ka Meghatop Cement Pvt. Ltd ha chnong Wahiajer, East Jaiñtia Hills.
Ka seiñ da ong ko wa i pyrchah toh deiwa bichaar yeiwa chem wei i bichaar dang lai i wot hapyrdi i pyrchah wa che na ki paidbah wa chong chnong ka Wahiajer, ki paidbah ka Elaka Narpuh wa ka District hi waroh kawi.
Da ong leh wa toh u ap yei sur yong ki paidbah wei ymtoh wow pyndem ha kiwon kiwon ki bor la ha ka chnong, ka Elaka næ ka District, neibhah ki paidbah em ki ka hok wow kynthup lang ha ki rai kiwa da ktah bait yei rukom im yong ki wei ymtoh wow mylliñ yeiwa eh wa maad ki.
Kamtæ da kyntu wa toh u pynsangeh noh ya katai ka Public Hearing neibhah wa toh i angnood yong ki tre chnong wa ki paidbah ka Elaka hi waroh kawi. Chooh chooh da pyrchah yei booh ya kani ka karkhana thymme neidaw wot wa boon ki karkhana ha ka District tangwa ym em wa yoh kreh iwa man iwa emkaam dooh neibhah kini ki karkhana da wanrah bru bait ki na baar.
Neitæ kini ki karkhana leh da ktah ki ya ka ramaw nadooh ka la’ær, ka um, i chait i khiah ki bru wei lada wan sa kawi daw chakri ko yow pynmyntoi ya ki bru kiwa na baar deiwa pynsih chooh chooh ya waroh ki soodong sookun.
Discussion about this post