Ka HYC South West Khasi Hills ryngkat wa ka HYC Umdohlun Circle da yachem ko ya ka Deputy Commissioner South West Khasi Hills ynne ka sngi ha kamra krehkaam yong ka hapoh i yahkhmat u Arbok Kharjahrin, President ka HYC SWKH, ryngkat kiwa yah khmat ka HYC kiwa kynthup ya u Moonkingstar L Paliar, General Secretary HYC SWKH, u Bantei Wanniang, Vice President HYC SWKH, u Rishotroy Kharjahrin, Organising Secretary HYC SWKH wa kiwi kiwi.
Ka HYC da lai yachem ko ya ka DC toh hadien wa lai pait ya ki thaw pynlang jhep Uranium ha Nongbah Jynrin South West Khasi Hills District dang ha kini ki sngi, heiwa ka seiñ da chem ko ya katai ka thaw da sdang kaad sdang piah ko.
Neiliang ka seiñ da sñiawkhia ko neibhah ini daw ye i wow wanrah yei maa wa khroo ya ki paidbah ka thaaiñ wei daw ktah ko leh ya ki doh-um doh-wah wa ya ki mrad wa psan khamtam wa kini ki mrad daw dih ki ya ka um wa tooid na kani ka thaw kawa ye u man bih.
Neiliang ka seiñ da ong ko wa khnang wow lait nei maa, da dawa ko na ka DC wow thung da ka takit wa laitlooid namo Independent Expert Inquiry Investigation Agency wow pyntikna lada em i ktah wa mih nei kaad i oor kini ki top pynlang jhep Uranium wei toh u kset wow tymmoh noh ya kini ki thaw wa pai.
Neiliang u Moonkingstar L Paliar da ong u wa da lai pait u ya kani ka thaw la ar sien ha uni u bnai heiwa da chem u wa em sakhiat i piah i oor ka thaw pynlang jhep Uranium, katwa kamtæ ka seiñ da dawa ko wa emkaam wow chimkhia bha yeini i kaam wei wow kheiñkor ya ka khnang wow myntoi ki paidbah ka thaaiñ liang wanang.
