Shillong: Ka Hynñiewtrep Youth Council (HYC) da dawa ko na u montri ka chnat kaam pohyung, u James K Sangma wow yaklam hajrong i jia ha New Balakhawa, Ri-Bhoi District wei wow wanrah biang ya u Secretary ka Hima Nongspung u Michael Warjri cha ka jylla.
Ki dkhot ka HYC da yachem ko ya u Director General of Police ka jylla Meghalaya, u R. Chandranathan, wow pynap yei sñiawkhia hajrong i jia na New Balakhawa.
Hawa yaklam wa kiwa pathai khubor u President ka HYC Central Executive Committee, u Robertjune Kharjahrin, da ong wa kani kaam kawa emkaam wow chimkhia bha wei emkaam jhan wow chimkti da ki pulit ka jylla Meghalaya wei ha i jooh i por da ong u wa ka seiñ da dawa ko wow kem noh ya kiwa emkti ha kani ka kaam.
Da ong wa man i iwa phylla wa uwa chah tba kti ha ki paidbah da chah kem u sa ha ki pulit Assam.
Katkam i ong u Robertjune, kani ka kaam ymtoh ka sien wa nyngkong wa ki paidbah kiwa im ha ki thaw khappood wow yoh ki i u maad yaka bichaar wym hok neibhah ka jylla Meghalaya ym chimkhia wei ym sonteri ko wow chngaaiñ paidbah.
U Kharjahrin da ong u leh wa ka seiñ da yoh yutip ko wa em kamwa 35 ngut ki damok kiwa da hiar thma ya i yung sah u Michael Warjri wei kamwa 300 ngut da patah ki ya oo cha yingkieñ wa dang chna wa em ha Mulukhi wei ya kini waroh kiwa emkti toh u kem lut ya ki.
Discussion about this post