Kiwa yahkhmat wa ki dkhot ka Hynñiewtrep Youth Council (HYC) Elaka Shilliang Myntang Area Unit, da pynsñiaw ki haki sahep yong ka PWD North Shangpung, West Jaiñtia Hills District, kamjooh ya u Contractor yei wym sñiawhun ya i rukom pynkreh ka PWD ya u sarok Nartiang-Jonglwit-Brato uwa jrong 15 Km, uwa haap hapoh ka Central Road Fund (CRF), uwa da sdang wow pynkreh nadooh u snem 2019, ha i lut wa T. 8,98,00,000.
Ha ini i lai pait ya uni u sarok, neiliang ki dkhot yong ka seiñ kiwa kynthup ya u President u Pynroi Shylla, Publicity Secretary u Kularskhem Sariang wa ki dkhot ka seiñ da pynsñiaw ki yei wym hun ya i rukom pynkreh ya uni u sarok neibhah kamwa man katni ha ki thaw wa da dep siang rong, kiwa boon hi da mih ki moo neidaw wa stang palat i siang rong.
Hawa yatoh wa ini, neiliang ka seiñ da dawa ko wa toh u siang biang ha ki bynta wa mih ki moo wa ki bynta wa stang palat i psiang, neibhah tang chi snem ym pu em, da boon ki bynta yong uni u surok da jæd da pra u. Katwa neiliang u Executive Engineer ka PWD North Shangpung, u E. Lyngdoh deilang wa u SDO u P. Shullai wa u Contractor u Victor Suja, da ong ki wa uni u sarok toh u siang psiang næ ka Blacktopping kawa man kamwa 20 cm wei uwa kmai cha chrooh 3.75 Meter, tangwa katkam i chem ha i lai sylli wa kiwa boon hi ki bynta uni u sarok man ki kiwa stang palat i siang rong. Hawa yatoh wa ini, neiliang ki sahep ka PWD kamjooh leh u Contractor da kular ki ya ka seiñ wow pynchna biang ya kini ki bynta wym pu biang.
Neiliang ka seiñ da ong ki wa ka thaaiñ toh kawi na ki thaaiñ wa sahdien tam wei da yoh ki ya uni u sarok hadien kamba 30-35 snem, kamtæ lada ka PWD ym pynchna bha ko ya uni u sarok, daw maad chiboon i eh khamtam hei kjut i chitom wa ka kamai kajih najrong wa kani ka thaaiñ jngai ko na ki thaw sor kiwa em ki yaw ki haat kamjooh leh ki thaw sumaar.
Kamtæ neiliang ka seiñ da kyntu joor ko ya ka chnat PWD kamjooh leh ya u Contractor wow pynkreh biang ya ki bynta wym pu biang yong uni u sarok neibynta i myntoi ki paidbah yong ka thaaiñ.
Ka seiñ da ong ko wa ym chong kli-kti ko lada ka chnat PWD ym ye ko wow leh katkam i dawa ka seiñ wei daw booddien neibynta wow pynbha ya uni u sarok.
