Haka kyrwoh na u Publicity Secretary ka seiñ HYC Narpuh Circle, u P. Syiemlieh da ong wa ha ka 10 tarik uni u bnai kiwa yahkhmat ka seiñ da lai dawa ki na u DC ka East Jaiñtia deiwa e da ka dorkhat wow dawa joor u pynsangeh noh chisyndon ya ki khyrdop Tollgate wow lum dan neibhah hawa pait yei jæd i pra u sarok ym yahaap dei wow su poisa ki paidbah.
Ka seiñ da ong ko leh kamwa man katni waroh da yoo ki dei khmat hadooh katwon sih u sarok NH-06 khamtam ha ka thaaiñ East Jaiñtia uwa da sih ter ter chadooh cha Malidor heiwa i rukom chakri wa e da ka NHAI ym yahaap de wa i rukom su ki paidbah heiwa ka NHAI da rem ko hei chakri yong ka.
Kamtæ neiliang ka seiñ da kyntu joor ko ya u DC wow chimkhia ya ini heiwa u DC da kular u wow chimkhia.
Ka seiñ da pynkynmoo ko wa i sih palat u sarok da wanrah ko yei mynsoo, i ya tyrrah kari kiwa lai wa wan wei khamtam kitu kiwa kjut wa chitom wow poi smat ki cha ki thaw sumaar.
