Dawa ka HYC War Jaiñtia naka JHADC wow wanrah ya ka aiñ wow tipmit ya kiwa e dawai kynbat

Jowai: Ka Hynniewtrep Youth Council (HYC) War Jaiñtia Circle da lai yachem ko wa u CEM ka JHADC ha ka 3 tarik uni u bnai yow dawa wanrah noh ya ka aiñ “Protection and Promotion of Traditional Medicine Act” wow tipmit ya kiwa e dawai kynbat hapoh ri-loom Jaiñtia.

Ha kane ka yachem, ka HYC da e yumut ko ya u Thombor Shiwat u Chief Executive Member ka JHADC wa toh u wanrah yaka aiñ tipmit ya kiwa sumaar kamjooh kiwa e dawai kynbat khnang wow ye ki u e ka sumaar kawa paka ya kiwa kjut wa ya kiwa chitom wei wow yada ya ki phlang ki jhoor wa man dawai yow wa pynemkaam yow pynchait ya ki bru ki wa kjut wa chitom wa ha rukom.

Nalor ini, ka HYC War Jaiñtia da dawa ko leh wow booh yaka thaw puræ namo ka Institute hapoh War Jaiñtia ka wow e sikai chaphang i rukom sumaar wei wow e dawai tynre yei ye u pynneh pynsah leh kamjooh ya ki khloo ki kjam.

U President ka seiñ u Yoodahunki Shylla da ong u wa ha ri-loom Jaiñtia da em chiboon kiwa e dawai kynbat nadooh ki chynrang wa ki kynthai wei ya ki dawai da chna da na kiwa mih cha khloo cha kjam, tangwa katkam wa man katni kiwa sumaar dawai kynbat ha ri-loom Jaiñtia ym pu yoh ki yei tipmit na ka Council wei ym pu em iwon iwon i yarap wa yoh ki na ka Council.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Heijooh i por u President ka HYC War Jaiñtia d ong u wa ka Council i kaam yong ka toh wow pynneh pynsah tangwa da man ko kawa baam lut hadooh wa u CEM da pynsñiaw u ha ka seiñ wa ka JHADC ka bood yaka kaam poisa (Finance) wei ym em ki kaam pynroi, kam ka seiñ ka pyrchah joor ko ya ini i klam u CEM neidaw wa ki paidbah ym em jied ki ya ki MDC du neibynta ka poisa, toh u leh ki iyi iyi wow yada ya ka jaitbru ri-loom Jaiñtia yong i. Kam ka seiñ u yeiñ skem ko ha ka yurim neibynta ka jaitbru wei u boodien ya kani ka aiñ hadooh wow jop.

Neiliang u Thombor Shiwat da e khublei kyrpang u ya ka HYC War Jaiñtia wa da e buit ko wow wanrah ya kani ka aiñ, kawa pait jngai wow pynneh pynsah ya ki dawai kynbat hapoh ri-loom Jaiñtia, kamjooh u CEM da kular u wow chimkhia hajrong kani ka kaam wow wanrah ha ka yalang ka EC khnang wow yoh yaklam wei wow phyllu yumut hajrong kani ka aiñ.

Ini toh katkam wa pyntip u Publicity Secretary ka seiñ u Riki Mukhim.