Ka Hynñiewtrep Youth’s Council (HYC) Narpuh Circle ha ka 21 tarik uni u bnai da lai booh dorkhat ko ha u Executive Engineer ka MePDCL, Khliehriat Distribution Division East jaiñtia Hills District hajrong ka yurim wow dawa u pynyoh lane wow pynbiang Lineman hapoh ka thaaiñ Lumshnong kawa haap hadooh ka chnong Umtyra.
Ka seiñ da ong ko wa kamwa man katni da em du uwi u Lineman lane uwa chna wa pait yow pynbiang ya i bordiñ ha kani ka thaaiñ wei katkam ka yutip wa da yoh ka seiñ hadien wa yaklam wa u Lineman u Arki Muksor hajrong i dooh bordiñ wei thut palat i bordiñ haka thaaiñ khamtam ha kini ki por lyiur wa joor bha i dooh bordiñ khak-khak, da pyntip u wa jynjar bha wow pynchna wei wow thooh heiwon wa sih da oo samen.
Kamtæ hajrong ini, ka seiñ da dawa ko wow pynbiang Lineman sa uwi khnang wow rap suk u pynyoh bordiñ smat manda em iwa sih, khamtam heipor miet wa emkaam yei bordiñ ya ki khynnah kiwa dang puræ Online Class, kamtæ neiliang u Executive Engineer ka MePDCL da kular u wow chimkhia ya ini i dawa yong ka seiñ.
