Ka seiñ Hynniewtrep Youths’ Council (HYC) East Jaiñtia Circle da thoh ko cha u DC ka East Jaiñtia Hills wow kylli kammon yoh Environment Clearance (EC) ka Star Cement Meghalaya Limited na ka Ministry of Environment, Forest & Climate Change neibynta wow tih moochuni na i thaw wa heh kamwa 42.051 Hectare iwa em ha Brichyrnot, East Jaiñtia Hills District, heiwa na ini i thaw kani ka karkhana daw ye ko u pynmih hadooh 2.507 Millon ton u moochuni.
Ka seiñ da ong ko wa ini i yohbor syndet kani ka Star Cement da pynkhyrngiat i ya kiwa boon ki seiñbhalang kiwa pyrchah ya ini i thmu wow pynheh kani ka karkhana ya i paar wow tih moo ko.
Kam wow pynkynmoo heini ka MSPCB da pynman ko ya i pynsñiaw paidbah wa khaddooh ha ka 21 Khonchonglad 2020 heiwa da poi chadooh u pood wa mynsoo ki bru wa ki pulit ha i pyrchah ya ini i thmu kani ka karkhana wow tih moochuni na i thaw wa jngai du kamwa 1.46 Km na ka Narpuh Wildlife Sanctuary wa 0.25 na ka Eco Sensitive Zone iwa da ktah chiboon ya waroh ki mrad wa kyrpang wa im hajan ini i thaw.
Ka seiñ da phylla ko leh wa hajrong ini i thmu wa da pyrchah da ki bru samen, ki seiñbhalang wa ki Dorbar Chnong ka thaaiñ Narpuh tangwa ka Ministry of Environment of Forest & Climate Change ka sorkar India dang e ko ya ka Environment Clearance ya ka Star Cement.
Kamtæ hajrong ini iyi waroh neiliang ka seiñ da dawa ko na u DC ka East Jaiñtia Hills wow pynche u ya ka seiñ wa hajrong kiyi ki yurim wa da yoh kani ka karkhana ya ka Environment Clearance.
