Ka HYC East Jaiñtia Hills da ong ko wa dap dei sñiawsih wow pait wa kani ka District kawa pynmih poisa bha ya ka sorkar dang sahdien bha ko hei liang ka roi ka paar khamtam ha ki luti ki syngkieñ kiwa ka seiñ da chem ko dei khmat.
Neini i daw, ka seiñ da yoo ko yei chem chitom ha Saipung Block hei lai i wan nadooh nachwa hadooh katni nei wym biang ki sarok yow lai yaw, lai cha ki yung krehkaam sorkar, yow lai skur khamtam dooh hawa kjut wa chitom.
Wei ha kini ki por wa joor slap ki chnong wa em cha kdong kam ka chnong Khahnar, Saibul, Thuruk, Moulsei, Molian wa kiwi kiwi de da hap ki wow lai kjat hawa lai cha yaw cha haat wa hawa lai thooh dawai lane lai cha ki thaw e dawai.
Kamtæ da ong wa u sarok toh u budloom yong ka roi ka paar wei kani Block toh kawa sahdien ha waroh ki liang nadoooh ka khayi pateiñ, ka puræ puthi wa kiwi kiwi de wei ka seiñ da kylli ko leh cheiwon wiar kiwa mihkhmat paidbah, cheiwon wiar ka sorkar?
Wei ini waroh pynyoo wa da rem ka sorkar wow wanrah ya ka roi ka paar hapoh kani ka Block, da ong ka seiñ deiwa dawa wow pynchna smat ya ki sarok hapoh kani ka Block.
