Ka HYC Shillong City da e ko yei kyrchaan ya i dawa ka seiñ kiwa kamai kari wow chah noh ya ki kari kamai (Taxi) wa ki Maxi Cab kam ki Sumo wa ki kari Tourist Taxi wow kamai ki kamwa jooh man khlem em de ka Odd/Even Number.
Ka seiñ da ong ko wa hadien wa da sñiaw ko yei ood wei chem chitom yong kiwa kamai kari da dawa ko na ka sorkar wow paitlang ya i eh i khoo yong ki.
Da ong ko wa lada ya ki yaw da chah u wai wei ya kiwa chong dai madan leh da chah ya ki, neiyi i daw won wym chah de ya kiwa kamai kari neibhah ki leh em ki ki yung ki sem wow psa wei wow su ya ka dan cha ka sorkar.
Katwa kamtæ ka seiñ da dawa ko na ka sorkar wow pyndam noh ya ka Odd Even Number ya kiwa kamai kari wei wow chah leh u kamai ki ha ka sngi Bibar neibhah kiwa dooh chem chitom ki hawa emkaam ki wow lai khamtam cha ki thaw sumaar.
Heijooh i por ka seiñ da ong ko wa emkaam wow pynduna noh ya ka dan neibynta ki kari da kamwa 80% beibhah wa boon ki kari ym yoh ki wow kamai ha uni u snem.
Kani toh katkam ka wyrta khubor na u John N Lyngdoh, President ka HYC, Shillong City.
