Ka Hynniewtrep Youth Council (HYC) da paan pynche ko na ka MeECL wa na u Montri wa pait ya ka chnat bordiñ ka jylla, u James PK Sangma hajrong i wanrah ka sorkar wow pynkrehkaam noh ya ki Smart Meter wei da dawa leh wa toh u sangeh chwa ya ini i thmu.
U General Secretary ka HYC, u Roy Kupar Synrem da ong u wa ka sorkar toh u pynsangeh chwa ko chipor yei thmu pyndait ya ki Smart Meter ha ka jylla katwa ym pu ye wow pynsñiawthooh paidbah kammon u Smart Meter u krehkaam u.
Ynne ka sngi neiliang ka HYC da khut ko ya kiwa mihkhmat paidbah nadooh ki MLA/MDC wei kamjooh kiwa pynlai chnong wow ya phyllu yumut ki hajrong ini i kaam ha Mawlai Polytechnic, tangwa ym em yoh ko yei kyrchaan, kamtæ da hap wow pynsangeh noh ya kani ka yalang, tangwa neiliang ka seiñ da pyntip ko wa da chim ko yaka luti wow lai saam kot lakdop wow pynsñiawthooh ya ki paidbah.
U Synrem da ong u wa ka MeECL em ko yei thmu wow pyndait ya ki Smart Meter kamwa tam 2 lak tylli ha ka jylla, deiwa yoh ram na ka Asian Development Bank (ADB) ha i pynlut wa T. 233 klur, ka wow pynkrehkaam da ka Satnam Global Infra Project Limited, wei kawa da thmu wow sdang chwa na nongbah Shillong wei bood won cha kiwi ki thaw.
Da ong wa i thmu wow pyndait ya ki Smart Meter hadooh katni dang man kawa kynrum kynram wei kawa ym che, wei da pynrap wa i dor yong uwi u Meter wow pyndait ha ki manyung man ko kamwa T. 9,444 iwa da boh dor chwa da ka Company.
