Ynne ka sngi u montri i chait i khiah ka sorkar pyrdi, u Dr. Harsh Vardhan da thoh u cha u Yoga Guru Ramdev wow pyndam wei wow paan-maap u heiyatoh wa i pynbaad u wa i rukom sumaar Allopathy toh i rukom sumaar biejsian namo “Stupid Science” heiwa da kam u wa ki dawai kam i Remdesivir, Faviflu, wa kiwi kiwi kiwa da pdiang ka Drugs Controller General of India ymye ki wow sumaar ya kiwa yoh COVID-19.
Hadien wa poor i Video ha ki Social Media wa pynyoo yeini i pynbaad u Ramdev, neiliang ka Indian Medical Association (IMA) da ong ko wa ini i pynbaad u Ramdev toh iwa bakla wei da thoh ko leh cha u Dr. Vardhan wow dawa pynchitom, pyndam wei wow paan-maap u Ramdev hajrong ini i pynbaad yong oo iwa khlem yurim.
Ka IMA da ong ko wa u Ramdev na ka Patanjali Yogpeeth Trust, Haridwar da kam u wa da ki lak ngut da yap ki hadien wa dih ki yei dawai Allopathic iwa da yah bakla ya ki bru.
Hadien ini ka Patanjali Yogpeeth Trust kyntait ko yeini i pynbaad ka Indian Medical Association (IMA) wa u Ramdev da yah bakla u ya ki bru.
Neiliang ka Patanjali da ong ko wa kheiñkor bha ko ya ki Doctor wa kiwa kreh ha i chait i khiah kiwa da kreh khlem sangeh sngi wa synyaaw kam ha kini ki por.
Heiyatoh wa ini waroh neiliang ka IMA da dawa ko wow pynchitom ya u Ramdev uwa da yah bakla ya ki paidbah wymtoh u ap ki ya ki buit ki Doctor Allopathy.
Neiliang u Dr. Harsh Vardhan hajrong ini waroh da thoh u cha u Ramdev deiwa ong wa ini i klam yong oo (Ramdev) da pyntakha i yei sñiaw ka ri wei da pynhiar kyrdan i leh ya ki bru kiwa embynta ha ka yakhun pyrchah ya kani ka khlam.
