Ka Joint Acton Committee (JAC) kawa kynthup ya ka Jaintia Hills Truck Owners Association (JHTOA) wa ka East Jaintia Hills Truck Owner & Transporter Association (EJHTOTA), lyngba ka kyrwoh wa da phah da u Chairman wa u Secretary yong ka, u Biangshwa Shylla wa u Kyrshan Dkhar, ha ka yalang wa jhan yong ka ynnin i janmiet ha Eastside Inn, East Jaiñtia Hills wei hadien wa da bichaar wei yaklam sani bha ko heiyatoh wa i man i long hajrong i wym yoh laad de ki Truck kit Cement wa Clinker wow pteiñ ya ka kit ka rong yong ki kattu la duna ar tayaaw, neidaw wa chah ksoh ki hei yakhih (Strike) yong ka MCTODA, da chim ko ya ka rai deiwa khor heiwa u phah pteiñ bait yei lai khih lai khan yong ki Truck yong ka nadooh myntu ka sngi. Weiwa heijooh i por leh ka JAC da dawa joor ko na ka sorkar Meghalaya wa hap ko wow chim yei bahkhlieh heiwa u pyntikna wa i lai i wan yong kitai ki Truck yong ka toh u man ko kawa khlem em i thut, i chah pyndik namo chah ksoh ha tymbud luti yong u sarok NH-6.
Ka JAC da ong ko wa deiwa che wa ka ym em bynta ko ha iwon iwon leh ha kani ka yakhih yong ka MCTODA, tangwa phylla wan ko wa ki Truck kit Cement kit Clinker yong ka leh da chah ksoh pathan ki wa kiwi tawan ki Truck wei i wym yoh laad de ki Truck yong ka kattu la duna ar tayaaw wow pteiñ u lai likhih likhan du neidaw wa chah ksoh ki ha katai ka yakhih ka MCTODA ha ki bynta yong u sarok NH-6 iwa da wanrah yei dooh-nong wa khroo hadooh kattæ kattæ ya ki tre Truck wa kiwa yah Truck yong ka kiwa em hapoh ka lama yong ka JAC najrong wa boon i dawa wa man-ka-sngi ha yung ha sem, sei hap u su ya ka ram (Instalment) Truck man-u-bnai, weiwa sa ha i por Christmas wei lehkmen snem thymme da wan kattu, heiwa em boon i dawa poisa ha yung ha sem.
Kamtæ lada ini i chah ksoh yong ki Truck yong ka JAC ha kani ka yakhih daw pteiñ bait ko khlem sangeh, kani daw wanrah chooh chooh ko yei dooh-nong iwa khroo bha wei i chitom ya ki tre Truck wa ya kiwa yah kari yong ka JAC wa kynthup wa ya kiwa ha-yung ha-sem yong kitai waroh arliang.
Kam wow pynkynmoo, ka JAC hachwa wa ka MCTODA u sdang ko yei yakhih yong ka, da lai kyrpaad ko (JAC) ya kiwa yahkhmat yong ka wow sñiawbha ki wow pynlait ya ki Truck yong ka JAC, tangwa sñiawsih u ong wa ka MCTODA ym em u burom ko yei kyrpaad yong ka JAC, katwa kamtæ ka JAC da hap ko wow chim da kani ka rai kawa kattæ.
Katkam wa man kattæ da em chiboon bha ki Truck yong ka JAC kiwa da chah ksoh chirup wei kit iwa khia. Wei lada jia wa kitai ki mar ki mata wa em hapoh yong kitai ki Truck sih noh ki, næ chah tooh ki næ chah leh pynsih ki, kiyi wow bahkhlieh yeini? Kwah i wa ka sorkar u pynche ko hajrong ini.
U Chairman ka JAC, uwa man leh kam u President yong ka JHTOA, da ong u wa nadooh wa seiñ ya ka JHTOA,ha u snem, 1982, ka seiñ ym jooh em u chong klikti ko, tangwa kreh ko chiboon ki kaam neibynta i bha i miat yong ki tre Truck kiwa em ha Ri-loom Jaiñtia, lada du samen næ chirup wa kiwi tawon ki seiñ wa kynthup ya ki seiñbhalang yong ka Ri Khasi-Jaiñtia. Ha u snem 2020, da em leh i dawa na ka sorkar jylla da ka JAC kawa kynthup ya ka JHTOA, MTU, AJCCTA, AJHTA wa kiwi kiwi ryngkat wa i kyrchaanlang kiwi kiwi de ki seiñbhalang yong ka Ri Khasi-Jaiñtia wow booh ya ka dor kit Cement wa Clinker ka wow ya imlang heiwa ka sorkar jylla leh katkam ka Notification wa pynmih ha 13 tarik u January, 2020, da booh dor ko Rs. 9 chi Metric Ton, chi Kilometer. Tangwa nei mih kiwi tawon ki daw, kamtæ lyngba ka Notification kawa da pynmih ha ka 25 tarik u September 2020, ka sorkar jylla da kylla biang ko ya katai ka dor deiwa booh Minimum Rs. 7 wei Maximum Rs. 11 chi Metric Ton, chi Kilometer. Katkam wa man kattæ hao ki Truck lai ki da ka dor wa da booh hi da ka sorkar jylla tangwa ha ka dor wa Rs. 7 chi Metric Ton, chi Kilometer.
U Secretary ka JAC, u Kyrshan Dkhar, uwa man leh u President yong ka EJHTOTA, oo leh da pynrap u deiwa ong wa ka EJHTOTA leh nadooh wa seiñ ya ka ha u snem 2023, ka leh ym em u chong thiah sngi ko, tangwa kreh ko chiboon ki kaam neibynta i bha i miat yong ki tre Truck wa ya kiwa chalan mar yong ka East Jaiñtia Hills District deiwa ya krehlang wei kyrchaan yong kiwi tawon haroh ki seiñbhalang yong ka Ri Khasi-Jaiñtia. Ka EJHTOTA da leh ko chiboon ki kaam wei ya pynbait kaam chirup wa ka sorkar jylla kamjooh leh wa ka seiñ ki Company Cement ka JHCMA, kiwa toh neibynta i bha i miat yong ki tre Truck wa kiwa chalan mar yong ka East Jaiñtia Hills District.
Ka JAC da ong haroh ko wa heiyatoh wa i dor wa da booh da ka sorkar jylla, hao neiliang yong ka leh katkam wa man kattæ ym em u thiah sngi ko, tangwa dang lai dawa ko neipor cheipor na ka sorkar jylla wa na ka JHCMA wow pynku noh ya katai ka dor, wei kamjooh leh ya ka Quota yong ki Truck na Jaintia Hills hapoh yong ka JHCMA khnang wa wow ya imlang. Heiyatoh wa ini dang ini wa da dep leh, ka JAC da lai booddien ko ya katai ka mat dawa yong ka na ka sorkar jylla wa na ka JHCMA heiwa ha ka 12 tarik u August, 2025, da lai li e dorkhat biang ko cha ka sorkar jylla wa cha ka JHMCA, wei wa hajrong ini da pynbood biang sa da ka dorkhat na ka EJHTOTA ha ka 4 tarik u September, 2025. Hajrong kani ka phang, ka sorkar jylla leh katkam i yaklam yong ka wa ka JAC da kular ko wow lum ya ka yalang yong waroh hi-eh kiwa ya embynta (All Stakeholders) yeini i dawa yow ya pyrkhat yeini i dawa yong ka JAC, tangwa ya kani ka yalang da pynslem ya ka kajiak neidaw ka chuti Puja wa ka Assembly Session ha kini ki por wa da dep. Hanla kattæ leh, ka JAC yooluti ko wa ya kani ka yalang ka sorkar jylla daw khut biang ko ya ka smat smat neibynta itai i kaam wa da kdaw haneiñ.
Ka JAC, da pynrap biang ko deiwa ong wa, hao i dawa wa i yaklam yong ka wa ka sorkar jylla wa kynthup wa ka JHCMA neibynta u booh ya ka dor wow ya imlang dang im ko wei dang lai pitit ko ka chakhmat hadooh ynne ka sngi. Tangwa katkam wa man kattæ ym pu sñiaw emkaam ko wow chim da ka luti wa pynchongsngi ya ki Truck neibhah ym pu sñiaw yahaap ko wow leh kamtea. Ka JAC, sñiawthooh ko yei chah ktah iwa joor yong ki tre Truck wa kiwa yah Truck lada pynchongsngi ya ki Truck hanla du chi sngi leh. Kamtæ katwon tam i chah ktah lada jia wa hap wow pynchongsngi ya ki Truck da ki tayaaw khlem mih soh mih sla iwon iwon leh deiwa pynchongsngi ya ki. Na ini i daw katkam wa man kattæ, ka JAC ym pu em u chong suki ko, tangwa dang pteiñ ko wow dawa na ka sorkar jylla wa na ka JHCMA ya ka hok yong ka, deiwa wa pyrkhat jngai bha, khlem da ktah chwa yei lai khih lai kamai yong ki Truck wot chi sngi leh.
Ini i wym yoh de ki Truck yong ka JAC wow lai kamai kajih da pynkthang mynsien ko ya ki dkhot yong ka JAC wa ya kiwa yah kari yong ka, deiwa pynrap ka kyrwoh na ka JAC wa ki tre Truck deiwa ong wa ki su hi ki ya ki dan wa ya kiwi kiwi de ki jait su cha ka sorkar, tangwa hapyrdi ini waroh, kawa pynlyngngoh won ya ki toh ileh won ka sorkar jylla ym ye ko u pyntikna yei lai khih lai kreh wa tikna wa lai bait wei wa chngaaiñ ya ki Truck lyngba u NH-6, ileh won chah ksoh ki kamni, kattu la chitayaaw tam?
Ka JAC da pynkut ko dei wa ong, “I thied Truck i neibynta ka ja-kpoh ymtoh neibynta u pynyieñ dur mot hi-eh ha yung næ ha sarok lane cha luti synkieñ yow pait-ke hi-eh ki bru. Katwa kamtea, lyngba kani ka khubor, ka JAC pyntip ko cha ka sorkar jylla wa nadooh myntu ka sngi, ka JAC u phah lai Load noh ko ya ki Truck yong ka kamwa jooh man hi, weiwa heijooh i por leh neibynta ini ka JAC dawa joor ko na ka sorkar jylla wa hap ko u chim ya ka laad ka luti wa i bakhlieh heiwa u pyntikna deiwa che katkam i bor yong ka wa i lai khih lai khan yong ki Truck ka JAC lyngba u NH-6 toh u man ko kawa tikna, kawa lai bait wei kawa man chngaaiñ, lym kamtæ daw hap ka JAC wow pyrkhat deiwa chim da kawi tawan ka luti wa khor”.
Discussion about this post