Ka Joint Action Committee (JAC) kawa kynthup ya ka East Jaintia Hills Truck Owner & Driver Association (EJHTOTA) wa ka Jaintia Hills Truck Owners Association (JHTOA), ynne ka sngi hapoh i yahkhmat u Chairman wa u Assistant Secretary, u Biangshwa Shylla wa u Deolangki Dkhar, chirup wa kiwi kiwa yakhmat da lai yachem ki markhmat wa u Deputy Chief Ministerka Meghalaya, u Sniawbhalang Dhar, uwa toh u pait leh ya ka Transport Department, deiwa rah wa ka dorkhat wow dawa na oo wow khut noh da ka yalang yong waroh hi-eh kiwa tohsap u ya em byntalang (All Concerned Stakeholders), khnang yow yoh u ya pynbait u pynkut noh ya kani ka chah ksoh yong ki Truck kit Cement wa Clinker na ki Cement Factory wa em ha East Jaintia Hills, deiwa pynmanyakhih yong ka MCTODA.
Ha kani ka jooh ka sngi, ka JAC kwah haroh ko wow yachem wa u Deputy Chief Minister ka Meghalaya, u Prestone Tynsong, uwa ksoh ya ka Home Department, tangwa na ki daw wym ye u kiar, ym em u yoh u yachem wa oo, tangwa da e cha oo wa cha u Chief Minister ka Meghalaya, u Conrad K Sangma ya ka dorkhat kawa yatoh wa i jooh i mat dawa yong ka JAC.
“Ha kani ka yachem wa u Dy. Chief Minister, da pynap pynsñiaw i ha oo, yei eh i khoo wa da yachem i ha kini ki ar tyaaw pura neidaw yong katai ka yakhih wa da khut pynman da ka MCTODA deiwa ksoh ya ki Truck kit Cement kit Clinker yong i chirup wa kiwi tawan ha sarok NH-6. Da pynsñiaw haroh i ha oo hajrong i ood i naam yong ki paidbah tre Truck, kiwa chalan mar, wa kiwa yah kari chirup wa ka yung ka sem yong ki hi, hajrong i jynjar i kthang wa mih neidaw wym ye de u pynbiang yei dawa yei emkaam wa man-ka-sngi ha-yung ha-sem – nadooh ka baam ka dih, ka kjut ka chitom, ka bai dawai dachin wa kiwi kiwi tawan, ki wym hoi u dooh man-ka-sngi”, da ong u Biangshwa Shylla, Chairman ka JAC.
U Deolangki Dkhar, Assistant Secretary ka JAC, da pynrap u deiwa ong, “Da pynap pynsñiaw kyrpang haroh i ha u Dy. Chief Minister, hajrong i ya tyngkhooh moosiang yong i kam ki tre Truck wa kiwa chalan mar heiyatoh wa ka EMI yong ki Truck cha ki Bank, ka bai skur, ka bai Hostel kawa da pyndik ya ka puræ puthi wa ya ka mynried yong ki khon ki kti yong i wa sei wan ka Christmas wa u snem thymme, chirup wa kiwi tawon i eh, najrong sei chah ktah yong i lum dan yong ka sorkar jylla, neidaw wa neh ma neh kani ka yakhih da ki tayaaw”.
“Heijooh i por da pynsñiaw wei pynkynmoo biang haroh i ya u Dy. CM, hajrong i kular yong ka sorkar ya ka JAC wow lum noh ya ka yalang yong waroh hi-eh ki Stakeholder chirup wa ka sorkar hadien wa dadep chuti Puja wa Assembly Session, khnang yow yachong pyrkhat, ya pynbait wei yachim rai neibynta i dawa ka JAC heiyatoh wow pynku ya ka bai kit Cement wa Clinker na ki Cement Factory ha East Jaiñtia Hills wei neibynta i bha i miat yong ki tre ri tre muluk kiwa em Truck, kiwa chalan mar wa kiwa yah kari”, da pynrap biang u Biangshwa Shylla.
“Ka yachem yong i wa u Dy. CM, da man ko kawa sñiawsuk sñiawhun, neibah oo leh, dei mynsien wa sñiawkhia da ap bha u yei eh i kthang yong i waroh kam ki Stakeholder tre ri tre muluk, wei da ong u wa, hapoh kini ki khajiak sngi, u yaklam u ya kani ka bynta wa ka sorkar wei wa wut-wut u yaleh u katwa ye wa lah u chim ya ki laad ki luti u ya pynbait wei pynkut noh ya kani ka kynrum kynram, khnang wa ki Truck kiwa kit Cement wa Clinkers yow yoh ki u lai likhih likhan kamwa jooh man khlem da em chooh i thut,” da ong u Deolangki Dkhar.
Ka JAC, ha kani ka yachem da ban joor bha ko hajrong i emkaam wow hap khut noh smat-smat ya katai ka yalang neibhah lada pynslem, kani ka rukom man ha Ri Khasi-Jaiñtia daw wanrah ko ym du i chah thngan, yei kordit yong ki hajar-hajaar ngut yong kiwa em truck, kiwa chalan mar wa kiwa yah kari wa ka manyung mansem yong ki, tangwa iwa yooma chooh toh kani ye ko wow wanrah ya ka huri hura, ka wym chongsuk chongchngaaiñ kawa joor ha ki sngi ki wow wan ha ka Ri Khasi-Jaiñtia hi waroh kawi.
Da ong haroh ka kyrwoh khubor wa chwa wow pynkut yei yakhlam yong ka JAC wa u Dy. CM, ka JAC da dawa haroh ko na ka sorkar wa ymtoh u mylliñ ko u khut ya ka JAC cha katai ka yalang kawa da dawa wow pynman noh smat da ka sorkar chirup wa waroh ki Stakeholder, neibhah hajrong wa ka sorkar da kular ko wow khut yalang ya ka JAC ha kini ki bnai kiwa da dep, kawa da sahteiñ hadooh ynne ka sngi, sa iwi wa man ka JAC kawi na ki Stakeholder wa dadep booh chwa i dawa na ka sorkar, wei man ko kawa em i hok yong ka wow ya emlang ha katai ka yalang khnang yow yoh u yaklam pynbait wei pynkut noh ya kani ka kynrum kynram kawa em katni, deiwa maham haroh wa lada jia wa em i leh lyndet næ mylliñ wow khut ya ka JAC cha katai ka yalang, kani u man ko kam i pynbor lane i pynchlur tong ka sorkar wow mih biang sa kawi ka yakhih pakhang Truck kawa rap joor chooh bar yeini.
Discussion about this post