Dawa ka JARF wow yasaaid yaka hukum ka Supreme Court wa pynlait u tih mooyong deiwa booh ki khyndon wa khor

Ka Jaintia Amalgamated Redressal Forum (JARF) da dawa ko ya ka sorkar jylla wa toh u khut yalang ya waroh le tylli ki Autonomous District Councils (ADC) yong ka jylla khnang wow ujor da ka Review Petition ha Supreme Court pyrchah ya ka rai yong ka Supreme Court kawa pynlait ya i tih mooyong deilang wa i kdoh ki hukum wa khor.

Ka JARF da mut ko wow pynmih ya katai ka dawa ha ka yachem lang wa ki 7 ngut ki MLA yong ka ri-loom Jaiñtia ha ka yalang wa da pynbait ha Orchid Restaurant, Thadlaskein ynne ka 14 tarik, tangwa uwi leh u MLA ym em poi ki cha katai ka yalang wot hadien wa kiwa yahkhmat yong katai ka seiñ da yang ki hadooh chi kynta tam ha katai ka thaw.

U General Secretary yong ka JARF u L S Rymbai da ong wa katkam i sñiawthooh yong ki, em ka laad ka luti wow pyllait ya ka jylla na i chah kdoh chah khoom yong ki aiñ yong ka sorkar India hawa yatoh wa ki kaam tih marpoh khyndaw wei kani ka laad ka luti toh wow ujor Review Petition pyrchah ya ka hukum yong ka Supreme Court kawa pynmih ha ka 03-07-2019.

Hawa kyruiñ cha ka hukum yong ka Supreme Court, da ong wa ka Court da hukum ko wa ya u mooyong wa dang sah uwa poi hadooh 32 lakh 56 hajar 715 metric ton na ki soo tylli ki District yong ka jylla kitæ ka East Jaiñtia Hills District, ka West Khasi Hills District, ka South West Khasi Hills District wa ka South Garo Hills District toh wow lilam noh da ka Coal India Limited.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

U Rymbai da ong chooh chooh u wa katai ka hukum da klam che ko wa ka Coal India Limited daw rai ko heiwon wow chikmti ya utai u mooyong, ka bai kit bai bah næ ka Transportation daw su da ka sorkar Meghalaya næ ka Coal India Limited næ waroh ar wei ya katei ka bai kit daw ah na i dor wa dep lilam ya u mooyong. Nalor itæ, ka sorkar jylla daw ah bai dan mooyong, ka bai Meghalaya Environmental Regeneration Fund (MERF) deilang waka 10% cha ka Coal India Limited na ka poisa kawa da mih na i dai næ lilam ya mooyong.

Hawa yatoh wa kani ka phang, u Rymbai da kylli u, “Ileh wa hadooh katni ym pu em sdang ya ka kaam mooyong da ka Coal India Limited?” Da kylli chooh chooh wa ka sorkar jylla iyi leh ko hajrong kani ka hukum yong ka Supreme Court? Ki tre mooyong tip ki næ ym tip ki ya i dor wa lilam ya u mooyong, katwon ka bai kari næ Transportation, katwon ka bai dan katwon katæ ka 10% cha ka Coal India Limited? Da kylli u leh katwon u khooid ini i leh ya ini waroh neibhah iwa chah ah da man ko kawa da boon chwa, chwa woi poi cha ki tre mooyong.

U Rymbai da kylli u leh wa ileh wa ka sorkar jylla ym yakhun eh ko wow pynkylla noh ya ka Para 12 A (b) yong ka Sixth Schedule yong ka Constitution ka ri India kawa kanti man ko wa u President yong ka ri India ym toh u Governor ka jylla Meghalaya uwa embor wow khanglaad ya i pynkrehkaam ya kawon kawon ka aiñ yong ka sorkar bei ha ka jylla Meghalaya.

Da ong u wa ini toh iwa emkaam neibhah wa ka Supreme Court ha katai ka hukum yong ka da kdaw ko wa ym em iwon iwon ha ka Sixth Schedule wa ye ko wow khanglaad yei pynkrehkaam ya ka aiñ ka Mines and Minerals (Development Regulation) Act 1957.

Da kylli u leh wa ileh wa ka sorkar jylla ym pu dep ko wow chna ya ka Mining Policy, ka Mining Plan nadooh u snem 2014 hadooh katni? Neibhah wa katni ka Supreme Court da ban joor ko yei emkaam yong ka Mining Policy wa Mining Plan chwa wow yoh u tih mooyong biang sa chisien.