Dawa ka JNC na u DC ka EJH wow pynbiang ya ki kor Computer neibynta ka Typing Test ki LDA

by Wyrta Staff

July 9, 2018

Reading Time: 2 mins read

Jowai: Ka seiñ Jaiñtia National Council (JNC) ynne ka sngi da lai yachem ko ya U Deputy Commissioner ka East Jaiñtia Hills District hei yatoh waka Typing Test yong ka kreh Lower Division Assistant Cum Typist, heiwa kamwa 57 ngut wa kynthup lang ya waroh kiwa da pass ya ka Written Test kawa pynman ha ka 22-07-2017 daw chimbynta ki ha kani ka Typing Test.

Ka seiñ da kyntu ko ya ka yungkrehkaam u Deputy Commissioner wow pynbiang bha ya ki Computer kiwa biang neibynta waroh kiwa yachim bynta ha ka kani ka Exam Typing Test, nadooh ki Keyboard, Desktop, Mouse wa kiwi kiwi kiwa emkaam ha kani ka Typing Test khnang wow man ko kawa salonsar ya waroh.

Kam wow pynkynmoo ha ki snem wa da lai da mih ki kulmar hapoh ka District hei yatoh waka Typing Test yong ki LDA cum Typist.

Ka seiñ da ong ko wa ym kwah de ko u mih ki kulmar neidaw wym biang ki Computer kamjooh i wym biang i rukom pynlai ya ka Exam.