Ynne ka sngi, ka seiñ Jaiñtia National Council JNC -7 Chnong Circle hapoh i yahkhmat u Mehi Rymbai In-charge ka 7 Chnong Circle wa u President ka 7 Chnong, u Wishes Siangshai da lai ki wow yachem wa u EE ka PWD Khliehriat Division deiwa e lang dei thoh yow kyrpaad pynchna yaka yingkieñ wa tip kam ka “Lyngkieñ Um-Su-Wai” kawa em ha u sarok Wah-Kmai-Um, Musniang-Rangad Road.
Ya kani ka yingkieñ da chna haki snem 1990 wei katni da booh ko hei maa wa khroo ya ki paidbah neibhah kani ka yingkieñ toh kawa da jan tkut wei kawa ye u haap ha iwon iwon i por neidaw wa da tlot ki nar wa da pynemkaam yow chna ya ka.
Kani ka yingkieñ toh kawa jrong hadooh 140 Meter kawa man leh kawi na kiwa jrong tam ha East Jaiñtia Hills wei man ko leh ka yingkieñ wa pynyabi ya boon tylli ki chnong wa kynthup ya ki ynñiaw chnong na Ladrymbai cha Moolamanoh, Mulang, Musniang, Musniang Rim, Moo-Nongtdu wa Lumputhoi najrong ki san chnong kiwa kynthup yaka Mutong, Cham Cham, Lum Chyrmit, Mukhaialong wa Pynthorsale hachwa wow pynyabi ko cha ka sarokbah NH-6 ha Kongong.
Uni u sarok man u leh kam u sarok Bypass uwa ki paidbah pynemkaam ki heipor wa sahkut kari ha u sarokbah.
Ka seiñ ha kini ki sngi kiwa da dep, da paan ko yaka Report naka chnat PWD lyngba u Deputy Commissioner neibynta wow pynchna noh ya katai ka yingkieñ, wei neiliang ka chnat PWD leh da dep ko wow phah ya katai ka Report cha ki bor wa haneiñ yow paan poisa yoh u pynchna noh.
Ha ini i yachem wa u EE, neiliang yong oo da kular u wow chimkhia hajrong ini i bynta wei wow leh leh yeiwa emkaam khnang yow yoh myntoi ki paidbah.
Neiliang yong ka seiñ da ban joor ko leh hakhmat u EE wa ini ymtoh u kut i du hei thoh næ i yachem wei toh u lai chakhmat yow pynmankaam yeini neibhah ini toh i kaam yap kaam im ka thaaiñ hi waroh kawi, wei neiliang yong ka seiñ daw booddien biang ko lada ym lai bait ini i kaam.
Discussion about this post