Ka Jaiñtia Student Movement (Western Region) da kyntu wei dawa ko na u Deputy Commissioner ka West Jaiñtia Hills District wow pynkrehkaam noh næ wow wai noh yaka thaw e sikai wa tip kam ka Rural Self Employment Training Institutes (RSETI) hapoh ka District neidaw wa katkam wa tip ka seiñ wa kattæ hi wa yaka poisa da wan ko haka Bank yow pynkrehkaam ya kani ka Training Institute.
Heijooh i por neiliang ka seiñ da tip ko wa ha ki artylli ki District da em kini ki Training Institute ha Ri Bhoi District wa ha West Garo Hills District wa pynkrehkaam daka State Bank of India (SBI) tangwa ha ka West Jaiñtia Hills da tip wa ka United Bank of India (UBI) da embynta ko deilang waka sorkar pyrdi wow pynlai ya kani ka thaw e sikai.
Haka chithi wa da e ka seiñ cha u DC, da e lang leh cha u Branch Manager ka UBI wow pynkrehkaam noh ya kani ka thaw e sikai khnang yow yoh myntoi ki paidbah wa chong chnong ka thaaiñ.
Neiliang ka seiñ da dawa joor ko ya u DC wa u Branch Manager ka UBI wow sdang noh u pynkrehkaam ya kani ka thaw ka wow yarap ya kitu kiwa ym em khih em khan kiwa em cha palatsor, da ong u Sebastian Sapuh, Organising Secretary JSM (Western Region).
