Ka Jaiñtia Students’ Movement (JSM) ynne ka sngi hapoh i yahkhmat u General Secretary yong ka, u Chanskhem Suchiang wa u Working President, u Jordan Rymbai dei sñiawkhia hajrong i sahkut kari ha sor Jowai iwa da ktah yei lai i wan ki paidbah, da e dorkhat ko ha u Executive Engineer ka PWD Road Jowai South Division, u R. Pakyntein wow dawa wow chna pynmiat ya u sarok Jowai Intermediary Bypass uwa lai luti na laad College lyngba ka Salini Colony, Riat Muleiñ cha yingkieñ Myntdu.
Ka seiñ da sorjamin (Survey) ko ya uni u sarok heiwa da chem ko wa deiwa chna pynmiat ya oo daw yarap i chiboon wow pynduna yei sahkut kari ha Jowai.
Heijooh i por neiliang ka seiñ da sñiawngooh wei da yaroh ko ya u MLA ka Jowai Constituency, u Wailadmiki Shylla uwa da kreh chitom wow wanrah ya u sarok wa miat wa bha ha Jowai wow pynsuk ya kiwa lai wa wan.
Chooh chooh ka seiñ da yoh ko leh wow yaklam wa u MLA heiwa da kular u wow thooh ki laad ki luti wow chna pynmiat ya uni u sarok.
