Ka seiñ Jaiñtia Students Movement Eastern Region (JSM-ER) ynne ka sngi da yachem wei da e dorkhat ko ha u Deputy Commissioner, East Jaiñtia Hills District wow dawa pynkreh biang ya ka Retaining Wall wa da oor wei da ieh khlem chna de ha sarok NH-6 la palat chisnem kawa em chwa wow poi ka Khliehriat Infiltration Check Gate kawa da chna da ka GR Infraprojects LTD.
Ka seiñ da ong ko wa kamwa man katni du kawi ka kari wa ye u lai ha ki bynta kani ka sarok wei ini daw wanrah i yei sahkut ki kari, i tyrrah kari kamjooh booh i hei maa ya kiwa lai wa wan.
Ka seiñ da dawa ko leh na u Deputy Commissioner wow tuklar ya ka NHAI East Jaiñtia Hills District wow pynkrehkaam ya ki Street Light wa em ha lynter u sarok NH-6 East Jaiñtia Hills District kiwa da neh khlem krehlaam hadien wa ka NHAI da pynyieñ ko ki wei da em kiwa pat wa oor katni neidaw wa da sap sarang.
Kamtæ ka seiñ da dawa ko wow pynkreh noh ya ki chisien don khnang wow chngaaiñ ki paidbah.
Neiliang u Deputy Commissioner da kular u wow chimkhia yeini i dawa ka seiñ.
Ya ka seiñ da yahkhmat da u Wellson R D Siangshai, President Eastern Region hei emlang u Kisme Dkhar, Asst. Secretary, Eiladmiki Dkhar, Discipline Secretary, u Skhembhalang Dkhar, President Southern Region wa kiwi kiwi.
