Ka seiñ Jaintia Students’ Movement-Eastern Region (JSM-ER) da lai e ko dei thoh cha ka yung krehkaam ka Animal Husbandry and Veterinary, East Jaintia Hills District hadien wa kiwa ri masi da chah ktah ki hei kjut masi wa tip kam Lumpy Skin Disease iwa dapoi leh hapoh ka District wei da em leh ki masi kiwa da yap na ini i kjut.
Ka seiñ da ong ko wa ini man ko i dooh nong wa khroo ya kiwa ri masi kiwa man leh kiwa dooh wa duk kiwa da chaniah ha i kaam ri masi.
Kamtæ ka seiñ da ong ko wa toh u yarap poisa cha kini kiwa ri masi kiwa da chah ktah na ini i kjut kam ha ka chnong Pamrakmai, Pamrapaithlu, Wapung Shnong, Sohkymphor, Byrwai Iongkaluh, Suchen, Iapmala, Byndihati, Lumshnong, Cham Cham wa kiwi kiwi ki chnong hapoh ka District.
Chooh chooh da dawa wow pynsñiawthooh ya ki warep chaphang kani ka kjut kammon wow yada wei ka chnat leh to u chimkhia ko wow lai e dawai yarap ya kini ki masi.
