Ka seiñ JSM hadien wa ujor ki paidbah ka thaaiñ Bambthong, neiliang yong ka hapoh i yahkhmat u Boyme Myrphet uwa man u Education Secretary ka seiñ da lai pait ko ya u Transformer uwa em ha ka chnong wei da chem wa uni u Transformer da booh ya oo khlem em i kær iwa da booh hei maa ya ki paidbah khamtam ki khynnah.
Neiliang u Boyme da dawa u na ki bor ka MeECL wow kær noh wut-wut ya uni u Transformer khnang wow lait na iwon iwon i jia wa sñiawsih hadien.
Da ong u leh wa ki bor chnong ka Bambthong da boonsien ujor ki yeini ha ka MeECL neibhah wa em u hajan ka yungmane ka Balang Presbyterian iwa booh yei maa ya kiwa lai wa wan khamtam heipor slap.
Heijooh i por ka JSM Jowai Circle da dawa ko na ka MeECL wow chna næ kylliang noh ya ki chrot bordiñ ha Lumpyrtuh Mihmyntdu neibhah wa booh ki hei maa ya ki khynnah khnang wow lait na iwa sñiawsih.
Neiliang u President yong ka Jowai Circle, u Emidao Rymkhlem wa u General Secretary u Dawan Lypon da chem ki wa kini ki chrot da sdang sih ki kamtæ emkaam wow kylliang noh ya ki.
