Dawa ka JSM wow phiah yaka Jowai Elaka wa kiwi de ki phang ha ka dorkhat

Jowai: Ka seiñ Jaiñtia Student’s Movement (JSM)-Central Body ynne ka sngi da li booh dorkhat ko ha u CEM ka JHADC u Thombor Shiwat wow dawa hajrong ki 4 tylli ki phang.

Nyngkong ka seiñ da ong ko wa ka Iaw Pynkat kawa em ha Khliehriat, East Jaiñtia Hills District kawa da seiñ nadooh u snem 1951, neibynta ka chnong Khliehriat, Dkhiah wa Dienchynrum katni da man ko ka Iaw wa heh wa emkaam tangwa da em ko boon ki baar jylla kiwa wan khayii kiwa seiñ khih kiwa ym em biang ya ki kot ki sla naka JHADC.

Kamtæ ka Jaiñtia Students Movement (JSM) da kyntu ko ya ka JHADC yow pynman ya ka sylli ya kini ki baar jylla wow pyntikna wa biang ki ya ki kot ki sla ha kani ka yaw kawa da sdang nyngkong du ya ki tre chnong.

Ka dawa wa ar toh wow phiah ya ka Elaka Jowai kawa em 83 tylli ki chnong hapoh yong ka ha East wa West Jaiñtia Hills District iwa man kawa chitom ya kiwa na East Jaiñtia Hills wow hap ki u lai chadooh cha Jowai yow yachem wa u Dolloi yow pyndep yei kaam yong ki iwa wanrah yei lut i por waka poisa.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ka seiñ da pyntip ko wa haka 07-10-16 kiwa yahkhmat ki 27 tylli ki chnong kiwa em hapoh ka Raij Tuber da yachem ki hapoh ka lama Raij Tuber Elaka Demand Committee ha Tuberkmai Shnong, East Jaintia Hills District heiwa da dawa wow phiah ya ka Elaka Jowai cha ka Elaka Jowai wa Elaka Tuber. Ka seiñ da ong ko ya ini ye u leh katkam Section 3 (2) clause (a) of the Jaintia Hills Autonomous District (Establishment of Elaka and Village and Election, Appointment, Powers, Functions and Jurisdiction of Dolloi/Sirdar and Waheh Shnong) Act 2015.

I wa le i dawa ka seiñ toh wow booh yung krehkaam ka JHADC ha East Jaintia Hills District yow lait u hap lai cha Jowai ya waroh ki kaam ka JHADC iwa hap ki bru wow pynlut ya i por waka poisa wei boon ki por hap lai boonsien neibynta i jooh i kaam cha Jowai.

Ka seiñ dawa ko leh wa chisien chi tayaw wa u CEM wa ki EM wow em ha Khliehriat yow yoh ki paidbah wow yachem wa ki.  

I wa soo wa dawa ka seiñ toh wow pynkhlan ya ka aiñ wa pait yei wan khayi wan seiñkhih ki baar jylla hapoh u pood u ang ka JHADC heiwa boon toh kiwa ym biang ya ki Trading License wei iwa ym em wa pait wa sylli ya ini da wanrah yei roi ki baar jylla kiwa pyndooh yei hok ki bru Pnar wow seiñ khih ki yow im ja ki.

Ka seiñ da e por ko hadooh ka 15 tarik uni wow leh ya ini waroh wei lada ym ye u leh ya ini, daw pynbor ko ya ka seiñ wow chim ya ka rai wa khor