Ka Jaiñtia Students’ Movement (JSM) – Wapung Unit wa ka Pamra Unit hapoh i yahkhmat u Kerbhami Dkhar kam u President ka Wapung Unit hei emlang u Eiladmiki Dkhar kam u Vice President wa u Ionis Rymbai, hadien wa da yoh yei ujor na ki paidbah wa wan thooh dawai kamjooh ki kot ki sla kam ka Birth Certificate na ka Pamrapaithlu PHC, ka seiñ da lai yachem ko ya ka Medical and Health Officer yong kani ka PHC deiwa ekti leh ya ka dorkhat ha ka.
Ka ujor na i paidbah hajrong kiwa kreh næ ki Staff yong kani ka thaw da man ki wym biang por u wan kreh katkam ki por wa biang, ini i leh yong ki da booh i hei eh i khor ya kiwa wan emkaam khamtam heipor wa em kiwa kjut wa chitom wei daw hap yang dei yong kynta.
Heijooh i por ka seiñ da sñiawsih ko u tip wa boonsien kini kiwa kreh yong kani ka PHC jooh klam ki dei kyntien wa khor ya ki paidbah wa wan emkaam kamjooh ya kiwa kjut wa chitom heithaw u yarap ya ki.
Ha i yachem wa ka Doctor yong kani ka PHC da kular ko woow chimkhia yeiwa pynsñiaw ka seiñ.
Chooh chooh ka Doctor da pynsñiaw ko leh yei duna yong kani ka PHC khamtam hei yatoh wa ka Ambulance kawa da rim, kamtæ emkaam ya ka Ambulance wa thymme, khnang wa kani ka PHC u ye ko u chakri rap miat cha ki paidbah.
Ka seiñ da ong ko leh wa da emkaam ya ka Emergency Room neibynta kiwa kjut wa chitom, wa kiwi kiwi ki kamra thiah wa kjut waphær waphær.
Kamtæ ka seiñ da dawa ko na ka sorkar wa toh u pait wow kyruiñ khmat ko cha kani ka PHC heiwow pynbiang yeiwa duna ha kani ka thaw kawa chakri kamwa hadooh 20-22 tylli ki chnong.
