Dawa ka JSM wow pyndam noh ya waroh kiwa sikai Officiating Teacher neidaw wym em bood katkam ka aiñ heipor wa thung kreh ya ki

Jowai: Ka Jaiñtia Students Movement Central Body (JSM) da dawa ko wow pyndam noh ya kawroh kiwa sikai wa kreh kam ki Officiating Teacher ha ki skur sorkar Lower Primary School (GLPS) wa Upper Primary School (GUPS) hapoh East Jaiñtia Hills District neidaw wa da thung ya ki khlem pynman ya ki Interview.

U Leningstar Rymbai, President ka seiñ lyngba ka RTI wa booh ha ka yungkrehkaam ka Sub Divisional School Education Officer (SDSEO), Khliehriat, East Jaintia Hills District, da kam u wa da chem wa kini kiwa sikai chipor (Officiating Teachers) da thung ya ki ym toh katkam ki kyndon ka aiñ.

U Rymbai da pyntip u leh wa ha kani ka RTI da chem leh wa i thung ya kiwa sikai toh u kreh ki 59 sngi donhi iwa pynyoo wa kiwa yoh kreh da yoh ki deiwa em wa kyrchaan ya ki wei da neh ki palat ya i por wa da booh ya ki.

Ha kani ka RTI da chem leh wa palat 30 ngut kiwa sikai da thung ya ki khlem leh Interview.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ha kani ka RTI da chem leh wa hapoh ka State Education Department, Saipung Community & Rural Development (C&RD) Block kawa man kawi na ki thaw wa sahdien dooh, ha ki 40 tylli ki chnong ym em skur sorkar Lower Primary School wei ha ki 75 tylli ki chnong won ym em ki ya ki skur sorkar Upper Primary School.

Na ki 40 tylli ki chnong won da em 38 tylli ki chnong kiwa em ka SSA Lower Primary School, ki skur samen wa ki skur ka JHADC.

Ha ki ar tylli ki chnong Kizakham wa Lalzal em ki du kawi ka Lower Primary School wa pyllai da ki bru samen.

Da em won sa 75 tylli ki chnong wym em ki skur sorkar Upper Primary School, da em leh 52 tylli ki chnong wa em ki skur SSA, Deficit wa ki skur samen katwa 23 tylli ki chnong ym em skur Upper Primary neidaw wa duna bur ki. Kini toh Moolait Bri Sutnga, Tympiahkasu, Sahkai, Kyrluh, Sielkan, Moopad, Umthe, Jongriathar, Teizol, Artan, P. Zoar, Kizakham, Lalzal, Shyrwang, Mookhain, Larket, Mooknor, Kseh, Fiangpui, Ngaibang, Lumchyrngan wa Lungmaicham.

Ka seiñ leh da ong ko wa ym em ki ya ki Parents Teachers Association (PTA) ym em leh ki Village Education Committee (VEC).

Ka seiñ leh da chem ko wa em ki skur da boon ware ki khynnah bar yei wa ye kiwa sikai u kreh, kamtæ da kyntu ya ka sorkar wow leh ko yeiwa emkaam yow pynbait ya ini waroh.