Ynne ka sngi ka seiñ Jaiñtia Students Movement (JSM) Western Region da lai yachem ko ya u Deputy Commissioner ka West Jaiñtia Hills, u Garod LSN Dykes wow booddien yei pynkreh ya ka Prefab Hospital hapoh ka District.
Hadien ini i yachem hawa yaklam wa u President ka JSM, Western Region, u Ribok Biam da ong u wa i daw wa booddien ya ini i kaam toh hadien wa da sdang wan ka la-ær wa le namo ka Third Wave yong ka khlam COVID-19 wei katkam i kular u Montri Rangbah ka jylla, u Conrad Sangma ha ka 11 Naiynru 2021 wa daw chna ya kani ka Prefab Hospital kawa 50 pyllong ha Jowai.
U Ribok Biam da ong u wa neiliang u DC da pyntip u wa da em 132 tylli ki pyllong ha MCH Jowai (Civil warim) wa ha Ummulong CHC wei ha kini ki 6-7 bnai da duna bha kiwa chah ktah kamtæ ympu em ware u dawa ya kani ka Prefab Hospital.
Da ong u leh wa u DC kular u wow chimkhia ya ini hadien wa wan ka Third Wave wei daw thoh leh cha ka chnat i chait i khiah wei lada emkaam daw chna noh da kawa paka (Permanent) ha Civil Hospital Ialong.
Chooh chooh u Ribok da ong u wa lada ymye wow pynkreh ya kani ka thaw yi myntoi wow pynkhor ki kyndon ya ki bru kamjooh ka Lockdown deiwa dawa leh wa da toh wow chna noh ya ka.
