Dawa ka JSU na ka EC & CEM wow jubab cha ki paidbah chwa u yap ka JHADC

Ka Jaiñtia Students’ Union-Central Body da beiñ joor ko ya ka EC ka JHADC wa yahkhmat da u T. Shiwat kam u CEM neidaw wa tlot wei wymye ki wow pynkrehkaam ya i bor wa da pynkup ha ki kam ki MDC.

Ka JSU da ong ko wa katkam i klam u CEM ha ka 1 Naisan uni u snem, pynyoo ko wa kani ka EC ym embor ko iyi iyi leh neibhah wa haap lai paanbor ko na ka sorkar jylla chwa wow leh iwon iwon i kaam iwa pynman ya ka wow man kam kawi na ki chnat sorkar wei yoodur lakam wym em de u man Autonomous ko.

Ka seiñ da ong ko wa ini booh i hei maa ya ka jaitbru katwa kamtæ da booh ko ya ki yukylli khamtam ya ka EC wei kini man ki kamni hawah:

Lada ki MDC wa ki EM ka JHADC toh ki wakreh ka sorkar jylla? Namo em ki ka yong ki hi i bor?

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Chong hok mo ya ki MDC ka JHADC u ka’i bait ki hakhmat ki MLA / Minister /næ sorkar jylla?

I dooh tulop ki wakreh ka Council la 7 bnai, yeiyi u pynbaad? MLA/Sorkar jylla/MDC?

Iyi ka JHADC da leh ko heiyatoh wa i khyndaw u chyiap, ka Dustur Riti ka jaitbru?

Ka JHADC tip sakhiat ko mo ya u pood u ang yong ka?

Iyi da leh ka JHADC hajrong i khayi pateiñ ha ka ri.

Yoosar ki MDC ka JHADC kreh ki du wow pynsy’aid ya ka chuki khlem pyrkhat ya ka tulop ki wakreh ka Council wei khlem pyrkhat de ya ki laad ki luti wow yada ya ka ri wa ka jaitbru da ki kyndon wa ki aiñ wa skem.

Ka JSU da kdaw ko ya kiwa boon ki bynta kiwa ye ka Council wow yoh dan kam ha ki chnat khloo (The Management and Control of Forests), i khayi da ki baar jylla (Trading by Non Tribals), ki Transit Fees, ki bai Registration, i chim wai ya ki thaw ka District Council (Lease of District Council Properties) wa kiwi kiwi. Hawa em kini, neiyi i daw won duna poisa ka Council?

Ka seiñ da ong ko leh wa i daw wymye ki MDC wow thooh laad thooh luti wow wanrah poisa ya ka Council daw booh ko hei maa ya ka Council.

Neiliang ka seiñ da dawa ko na kani ka EC wa na u CEM ka JHADC wow pynche wei jubab ya ki mat wa da wanrah haphrang chwa wow yap ka Council, yow sñiawthooh wei wow pynkhreh ki paidbah ka Ri-loom Jaiñtia, da ong u president ka seiñ, u Lawyerson War.