Jowai: Ka seiñ JSU wa ka seiñ HANM hapoh i yahkhmat u Treiborlang R Suchen wa u Lampharang Kharbani deiwa synran lang leh da kiwa yahkhmat yong ka seiñ JSU seiñbei u Lawyerson War, President wa u General Secretary u Jersom Shylla wa kiwi kiwi de ki dkhot yong ki ar seiñ da yachem ki wa u montri khynnah yong ka sorkar India u Ramdas Athawale uwa ksoh yaka chnat Social Justice and Empowerment yong ka sorkar India heipor wa wan u cha Shillong.
Kini ki ar seiñ da yachem ki wa u montri ka sorkar pyrdi mar khmat ha Pine Wood Hotel, Shillong wei da e leh cha oo ya ka dorkhat kawa yatoh wow pynthymme ya ka Reservation policy næ ka bhah deiwa e bhah rap boon manda thung kaam thung jam ya ki tre jylla Meghalaya kiwa kynthup ya ki Khasi ,Jaiñtia wa u Garo ha ki yung krehkaam sorkar nadooh ki Hospital wa ki thaw puræ ka sorkar pyrdi. Khamtam wow bhah rap boon ya ki kaam Nurse wa Doctor ha Hospital NEIGHRMS wa NEIAH, ha NEHU khamtam ya ki kaam Lecturer wa Professor wa ki kaam ophis, ha National Institute of Technology kawa wai thymme ha Sohra, ha NIFT kawa daw wai thymme ha Mawdiangdiang wei khamtam leh neibynta ka bhah thung kaam hapoh ka Meghalaya Rural Bank (MRB) wow thung noh rap boon ki Khasi, Jaiñtia wa Garo neibynta ka Post Scale -1 Officer wa kiwi kiwi ki kaam wa rap heh.
Kini ki ar seiñ hadien wa da yoh ki wow e dorkhat ha u montri khynnah ka sorkar pyrdi da yoh ki wow yaklam rap boon por wa oo, heiwa u Treiborlang Suchen da ong u wa ki arseiñ da boodien ki ya kani ka kaam wei da kyntu lang ya ka sorkar jylla wa toh u chim khia wow yaklam wa ka sorkar pyrdi wow bhah kham boon ya ki Khasi, Jaiñtia wa Garo kiwa ym duna ya 85 % i boon paaid kamwa 25.5 lak na ka 36 lak i boon paaid hapoh ka jylla Meghalaya katkam ka Census næ Economical and Statistical Data-2017 yong ka sorkar jylla.
U Treiborlang da ong u leh ym myntoi wow dai ya ki thaw yong i ki tre ri tre chnong cha ka sorkar neibynta wow chna yaka thaw puræ wa Hospital kiwa heh yong ka sorkar pyrdi lada kini ki skur bah wa Hospital lada ym wailaad wow yoh kaam yoh jaam ya ki khon khynroo khyllood Khasi, Jaiñtia wa Garo wei ini daw wanrah ko yei tooid wa i wan buhai chnong kiwi kiwa na baar jylla.
U President seiñbei yong ka HANM da ban joor wa toh u dawa ya ka hok mantre deiwa ong leh wa ka sorkar jylla toh u pynyoh ko næ dawa wow bhah rap boon ya ki tre jylla, ki tre chnong wei wow pynthymme ya ka Reservation Policy hapoh ka jylla hawa yatoh ha ki yung krehkaam ha ki ophis, Hospital wa ki thaw puræ wa pynlai da ka sorkar pyrdi wei pynrap chooh chooh u wa hadooh ki Company ki bru samen kiwa em hapoh ka jylla leh toh u thung kreh ki da ki Khasi, Jaiñtia wa Garo.
Discussion about this post