Dawa ka JSU waka HANM wow thung kreh da ki tre chnong haka Meghalaya Rural Bank

Jowai: Ki ar seiñbhalang ka Jaiñtia Students’ Union (Shillong Circle) waka Hynniewtrep Achik National Movement hapoh i yahkhmat ki ar ngut ki President ka seiñ u Treiborlang R Suchen wa u Lamphrang Kharbani da lai yachem ki ya u Chairman ka Meghalaya Rural Bank kawa em ha Khyndai Lad, Shillong, kam wow boodien ki ar seiñ yei lait kaam hapoh kani ka Bank kawa da pynbaad ki ar seiñ wa noh chiliang hapoh ka jylla Meghlaya yaka kaam neibynta ka Scale-1 Officer wa lait du kawi neibynta ki Scheduled Tribe kawa boon wa lai cha ka General Category hadooh 6 tylli wa 2 tylli ya ki Scheduled Caste.

Neiliang ki ar seiñ da pynsñiaw ki yei wym sñiaw yahap ini wa leh waka Reservation Policy yong ka sorkar heiwa ya ki kaam Officer da pyllait du kawi neibynta ki Scheduled Tribe hapoh ka jylla Meghalaya wei kani da pyndooh mynsien wei da khang laad ya ki khon khynroo khyllood kiwa biang kyrdan puræ wow yoh psiah kaam cha kani ka Bank.

Ki ar seiñ da dawa ki leh naka sorkar jylla hapoh i yahkhmat u montri rangbah u Conrad Sangma wa toh u sñiawthooh wei wow dawa na ka sorkar pyrdi wow e laad ya ki khon khynroo khyllood (Scheduled Tribe) wow psiah rap boon cha ka kaam Officer hapoh ka Meghalaya Rural Bank.

U President yong ka JSU (SC) da kyntu u ya ka sorkar jylla wow bood yaka nongmuna ka jylla Mizoram neidaw wa ka Mizoram heiwa ki sahep sorkar Grade-1 boon ki ST. Da ong u leh wa i ku i dooh kaam dooh jam katwa dang lai ki por ym toh wa neidaw wa duna ki kaam hapoh ka jylla, toh du neidaw wa chah thombor yei hok ki tre chnong ki tre jylla. Wei ym toh u pynman ka kam ka kaam Politics wow pynbaad mar kylliang hapyrdi u Conrad wa u Mukul chapang kani ka phang hapoh ka yung dorbar chna aiñ ka jylla.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Kamtæ neiliang u Treiborlang da kyntu u ya ka sorkar kawa katni wow chna noh da ka State Job Policy waka State Youth Policy yow pynsuk ya ki khynroo yow yoh kaam yoh jam ki kamjooh ya kiwa seiñ khih.

Neiliang u President ka HANM seiñbei, u Kharbani da ong u wa ki ar seiñ ym chong klikti ki katwa ym pynbait ya i bhah ki tre ri tre chnong.