Ka Jaiñtia Students’ Union- War Jaiñtia Circle (JSU-WJC) ynne ka sngi da phah dorkhat ko cha u Deputy Chief Minister ka jylla lyngba ka yung krehkaam u Deputy Commissioner West Jaiñtia Hills District wow dawa pynku kyrdan noh ya ka chnat PWD Sub-Divisional Office kawa em ha Amlarem cha ka kyrdan Divisional Office (EE-Office).
Katkam ka dorkhat ka seiñ da pynsñiaw ko wa ka Amlarem Civil Sub-Division toh kawa da sdang nadooh ka 12 Khonchonglad 1976 wei pait ko leh ya ki thaw khappood (International border) wa ya ka khayi baar ri wa heh tam ha Meghalaya (International Trade) wa ka Ri Bangladesh katwa kamtæ da toh hok wow yoh ko i yung krehkaam sorkar khnang wow em i yajan hapyrdi ki paidbah wa ka sorkar.
Da kdaw ko leh wa katkam wa man katni ka Divisional Office (EE) em ko ha Jowai ya kawa tip kam ka PWD South Division, wei kani ka Division pait ko ya ki thaw wa haap hapoh ka Amlarem Civil Sub-Division, wei ini da pynchitom i ya ki paidbah ha i lai i wan nadooh i por, i bai lai bai wan kamtæ ka seiñ da sñiaw ko wa da emkaam wow kyrriah namo wow e kyrdan noh ya ka yung krehkaam Executive Engineer kani ka chnat ha Amlarem naka PWD SDO cha ka kyrdan PWD E.E.
Ka seiñ da dawa joor ko na ka sorkar wow pyndep yeini wut-wut lym kamtæ ka seiñ daw sdang noh ko da ki yakhih neibynta i bha i miat ki paidbah ka thaaiñ War Jaiñtia.
Ka seiñ da kylli ko leh wa lada ka sorkar ya ka PWD Jowai North Division da kyrriah na Jowai cha Shangpung, neiyi i daw won ymye u kyrriah ya ka South Division cha Amlarem, kawa man ka Civil Sub-Division kawa da rim bha?
