Ka JSU-Khliehriat Circle chirup wa ka JSU-Southern Border Zone hadien wa thooh bniah la kattu katni por ryngkat wa lyngba u Vice President ka NCP Meghalaya, da pynsñiaw ko yei sñiawkhia wa i sahnood hajrong i wympu ye ka sorkar wow booh ya ka yung krehkaam ka chnat Forest and Environment Department kawa pura ha East Jaiñtia Hills District.
Ka seiñ da ong ko leh wa deiwa em ka yung krehkaam wa pura ha East Jaiñtia daw man i kyrkhu ya ki paidbah neibhah ym emkaam wow lai ki cha Jowai man-i-por lada emkaam.
Kam wow kdaw heini, ka East Jaiñtia da man ko kam ka District wa paw khmat bha ha i kaam khayi pateiñ khamtam i em ki karkhana wa har rukom.
I em ki karkhana wa i kaam khayi moochuni wa kiwi kiwi da pynman i ya ki bru kiwa em ya ki khloo wow yaleh ya ki Mining License wei ini da wanrah i yei eh i khoo ya ki wow lai cha Jowai.
Kamtæ ka seiñ da dawa ko na ka sorkar wow booh noh ya kani ka yung krehkaam ka chnat kawa pura hapoh ka District neibynta i bha i miat ki paidbah liang wanang.
