Ka Jaiñtia Students’ Union, War Jaiñtia Circle, ynne ka sngi hajrong ki sarok wa pynyabi ya ka Muktapur cha ki le tylli ki chnong wa kynthup ya ka Amlarem, Dawki wa Lad Rymbai, da dawa ko na ka sorkar wow chimkhia ko u chna noh ya ki neidaw wa da sih ware ki.
U Eddy Kery Pohtam, uwa man u President ka JSU War Jaiñtia Circle da ong u wa kini ki sarok wa lai lyngba ka khappood toh kiwa da chah iehbeiñ bha wei ym kheiñkor de ka sorkar ya ki hanla pynsuk ki ya ki warep, kiwa chong chnong, kiwa uiñke wa kiwi kiwi kiwa lai lyngba kani ka sarok.
Da ong u wa deiwa em kini ki sarok daw myntoi ki 20 tylli tam ki chnong khappood ka West Jaiñtia Hills District kiwa em hajan ka Bangladesh kiwa kynthup ya ka Pdengshakap, Amlari, Syndai, Muktapur, Lakroh, Hartali, Amlanai, Trangblang, Hawai Sutnga, Lumsohrmen, Lumpyngangad, Pasadwar, Karkhanna, Hawaibhoi, Sengkhat, Jaliakhola, Amjalong Bhoi, Amjalong, Amsku wei pynyabi ki leh ya ki chnong khappood ha East Jaiñtia Hills District kam ka Hingaria, Huroi, Kwator, Borghat wa kiwi kiwi.
Kini ki sarok daw pynsuk bha ki ya ki warep heiwa daw ye ki wow pynkit ya ki kwai, pathi, murit, kba wa kiwi ki jait jhoor wa ki soh wa rep cha kani ka thaaiñ wei daw ye ki u pynpoi ya kini ki mar rep cha ki yaaw ki haat.
Daw pynsuk ki leh ha i khayi pateiñ wei wow chalan ya ki mar cha Bangladesh lyngba ka Dawki wei ya kini ki mar ye u wanrah na East Jaiñtia Hills District næ Assam lyngba ki chnong Malidor, Umkiang, Khliehriat, Lad Rymbai wa kiwi kiwi.
Ka seiñ da kdaw ko leh deiwa em ki sarok wa paka daw ye u pynku ya ki kaam uiñke suwari neibhah daw ye ki u pait ya ki loom ki wah, ki kchaaid, ki krem wa kiwi ki thaw wa yoosuk ha ka thaaiñ deiwa kdaw leh ya ka nan wa sum ki syiem ha chnong Syndai, ka Kali Mandir ha Muktapur, ka thaw kñia ha Borghat, ki rood wah namo ki River Beach ha chnong Borghat, Karkhanna, Pasadwar wa Lumpyngad wa kiwi kiwi.
Heijooh i por da ong ka seiñ wa deiwa em ki sarok daw pynsuk ko ya i lai i wan ki chipai Border Security Force wei i em leh ki Border Outposts (BOPs) ha tymbud u sarok na Muktapur Dawki wei Muktapur Jaliakhola.
Chooh chooh da kdaw ko leh ka Yaaw Muktapur toh kawi na ki yaaw wa heh ka Ri-loom Jaiñtia wei man ko leh kawa da pawnaam bha wei deiwa em kini ki sarok daw ye u pynheh chooh chooh ya kani ka yaaw kawa na ki por ki Syiem Jaiñtia.
