Ka seiñ JSU ynne ka sngi da dep phah chithi ko cha u Chief Minister yong ka jylla Meghalaya neidaw wa mih ki hukum waphær waphær na ki chnat sorkar waphær waphær yong ka sorkar, neidaw wa kamni booh ko ya ki paidbah hei kulmar yumut, kamtæ ka JSU e yumut ko wa toh u pynmih du kawi don ka hukum na ka sorkar ha waroh ki District yong ka Meghalaya.
Ka seiñ da ong ko wa u khñiang COVID-19 ym toh u khñiang wa yaphær na kawi ka Distirct cha kawi wei man u u jooh ha waroh kawi ka pyrthai, ka ri wa ka jylla kamjooh. Hawa kamtæ ka seiñ JSU sñiaw ko wa ya ki hukum wa da dep pynmih chiboon tylli da ki chnat sorkar waphær waphær, kini waroh booh ki yei eh yaki paidbah kiwa chong wa sah cha nongkyndong ki wym jooh pynemkaam næ ki wym tip wow pynemkaam ya ka Internet yow yoh ya ki khubor wa ki hukum wa da phah neipor cheipor da ka sorkar, kamjooh leh ini i leh yong ka sorkar da pynkulmar bha ko yaki paidbah nongkyndong.
Ka seiñ JSU da kyrchaan ko ya ka rai yong ka sorkar jylla wa ka sorkar India wow yada na uni u khñiang COVID-19, deiwa phah chong khop ha ki yung ki sem hadooh 21 sngi kamjooh leh wow ya jngai na uwi ya uwi kamwa 2 Meter yow lait u chah ktah lane u yabi na u ni u COVID-19. Hawa kamtæ ka seiñ da kyntu ko ya ka sorkar wow pyndam noh u e hokum chibet da iwi chibet da iwi wow wai ya ki kari lane ki yaw ki haat wa ki chnong ki thaw. Da pynkynmoo ya iwa jia ha Iawmusiang, Jowai wa da mih ki paidbah kiwa da kulmar wa da boon palat ki hukum yong ka sorkar.
Ka seiñ da pynkynmoo ko wa nyngkong da rai haka 23 tarik wow wai chi sngi khang neitæ won u khang ar sngi wa wa i pynlai du yaki kari kamai wa em ya u Even Number dep te sa ki Odd Number, dep te mih leh kamjooh ka hukum wa ya ki kari Private ym chah u lai ki cha kiwi tawon ki District hapoh yong ka jylla. Hadien won da mih sa kawi tawan ka hukum ha ka miet 24 tarik wada pynkrehkaam Curfew ha East Khasi Hills District. Kini ki hukum waroh kiwa da dep pynbna waroh chi kattu booh ki ya kiwa chong chnong ka jylla hei kulmar wa da pynman leh ya kiwa boon kiwa ym em u yoh yaka khubor na ka Internet u sah ki hei doom hei lyngngoh khamtam ki nongkyndong.
Kamtæ ka seiñ JSU e ko i yumut kamjooh leh da kyntu ko ya ka sorkar jylla wa da toh u pynemkaam ko du kawi ka laad pynbna kiwa ye u won naka DIPR, NIC, AIR , Doordarshan, PA System yong ka dong ka chnong, wa ki Cable Network yong ka jylla wow pynbna ya ki khubor du hadien ki rai wa khaddooh ka sorkar, kamjooh leh wym toh de u phah da kiwi tawan ki chnat kam ka Transport, Health, Tourism wow phah ki ya ki hukum katwa ki bor District u phah ki da kiwi tawan ki hukum.
Ka seiñ da kylli ko wa iyi i myntoi u em ya ka chnat DIPR wa kiwi tawan ki laad pathai khubor cha ki paidbah kam ha kini ki por, ka sorkar toh u phah bait lyngba ka DIPR wa ki bor District yow phah ya ki khubor cha u paidbah. Ka sorkar toh u phah ko ya ki hukum du kawi ka rai ym toh kamwa man ha kini ki sngi wa da phah ko chiboon tylli ki hukum kini toh pynkulmar wei pynsaja ko ya u paidbah yong ka jylla.
Ka kyrwoh wa da phah da u President ka JSU Shillong Circle, u Treiborlang R Suchen.
Discussion about this post