Ka Jaiñtia Students’ Union (JSU) ha ka 27 tarik uni u bnai da thoh ko cha u Secretary ka Ministry of Environment, Forest and Climate Change ka sorkar pyrdi wow pyrchah wei wow dawa pyndam noh ya ka Draft EIA Notification 2020 neibhah kani ka hukum daw ktah ko chiboon ya ka rymaw.
Ka JSU da ong ko wa kani ka Notification man ko pyrchah ya ka aiñ wei ym man ko ka wow yada ya ka rymaw wei ym yahaap wow thap ya ka ha ka Environment Protection Act(1986) wei ini i leh ka sorkar toh wow pynsuk wow ktah ya ka rymaw.
Ka seiñ da ong ko wa kani ka Notification ebor (Clearance) ko wow chna ya ki karkhana (Project) pyrchah ya ka aiñ (Post Facto Clearance) wei daw wailaad ko wow tyngkheiñ ya ka aiñ yada ryma wei yeini ka seiñ da pyrchah joor bha ko.
Chooh chooh da ong ko wa deiwa pynkrehkaam ya kani ka Notification, ym emkaam de wow chim ya ku yumut ki paidbah ya ki kreh ha ki thaw khappood kiwa jngai 100 km na khappood wei ini daw ktah ko chiboon ya ka jylla Meghalaya kawa yajan bha wa ka ri Bangladesh.
Kiwi tawon ki bynta toh wow pyndooh yei emkaam wow chim yumut na ki paidbah ya ki kaam kiwa hanla katni lyngba EIA Notification 2006 dang man ki kiwa emkaam tangwa da pyntbian yei por na ka 30 cha ka 20 sngi wow chim yumut na ki paidbah wei ini pynyoo i yei buit wa leh embor ka sorkar.
Neiliang ka seiñ da beiñ joor ko yeini i rai ka sorkar khamtam ha ini i por wa em ka khlam u COVID-19 neibhah wa kani ka rai dang emkaam bha ko yei tyrwa yumut ki bru chemphang wa ki paidbah kammon wow yada ya ka rymaw.
