Dawa ka JSU wow pynlai noh ka sorkar yaka EMRI 108 Service

Jowai: Ka seiñ Jaintia Students’ Union Central Body da pynbor ko yaka sorkar wa toh u chimkti noh ya ka EMRI 108 wei wow pynlai da ka chnat ka chait ka khiah yong ka sorkar jylla

Ka seiñ JSU hadien wa da ngam yillu ko ya kani ka yakhih yong ki wakreh yong ka 108 hapoh ka lama MEMRIWU da chem ko wa da toh hok wa kini ki wakreh wow yakhih pyrchah ya ka Company GVK kawa pynlai ya ka 108 Service hapoh ka jylla. I daw wa ka seiñ ka kwah ko wow chim hi noh da ka sorkar, toh neidaw daw wa da chem wa jan waroh i lut i sep yong kani ka EMRI 108 da pynlut na ka poisa ka sorkar jylla waka sorkar pyrdi lyngba ka National Health Mission (NHM).

Ka seiñ JSU lyngba ka kyrwoh na u Treiborlang R Suchen, President Shillong Circle, da ong wa iyi i eh ya ka sorkar wow chim hi noh ko ya ka 108 EMRI ka wow pait da ka chnat ka sorkar ka Health and Family Welfare neibhah lada ka sorkar u chim ko wow pynlai hi noh, u man ko kawa bha neibhah i pynlut man ko kawa duna palat wow pynlai ya ka 108 EMRI Service hapoh ka jylla neibhah wa ym emkaam wow chna ya ki yung sah næ ki Quarter ya ki wakreh, kamwa man katni neibha ye ki wow sah ha ki CHC, PHC, Police Outpost wa kiwi kiwi de ki yung sorkar, wei ya ki Ambulance leh toh kiwa da em chwa wei emkaam du wow chna pynmiat wei wow pynboon ki.

Ka seiñ da sñiaw ko leh wa ka sorkar hei yong sakhiat toh u yaleh ko wow nang pynbha ya kani ka chakri paidbah (Service) yow yoh myntoi kiwa boon khamtam ya kitu ki chnong kiwa jngai na ki Hospital sorkar wei kamjooh ya kitu kiwa em ha ki tyrrah kari kiwa emkaam ya i yoh sumaar wa jhan.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ka seiñ ka dawa ko leh na ka sorkar wa ym toh u beh kaam ya ki wakreh kiwa em katni ha ka 108 EMRI lada ka sorkar u chim ko ya kani ka kaam, neibhah ki wakreh kiwa em ha ka MEMRIWU da man lypa ki kiwa da chah sikai na i por cha i por wei toh kini ki jooh ki wakreh kiwa da ye u e sumaar ym duna ya ki 2 lak ngut kiwa kjut wei kamwa 15,000 sien kiwa da pynkha ya ki khonbo ha kani ka chiphaw snem i lai luti ka EMRI 108 Service hapoh ka jylla.

Ka seiñ JSU ka em ko leh ka sabut satar wow pynsakhiat wa kani ka Company ym em de kheiñkor ko wot ya ka sorkar jylla leh neibhah da tyngkheiñ ko ya iwa da yakut namo ka “Status Quo” deiwa ah tulop, u kyrriah ya ki wakreh hanlada u montri u A.L. Hek da phah u yaka GVK wa ym toh u leh ko iyi iyi hapoh ar bnai katwa ym pu yoh ya ka bui (Report) na ka Special Committee kawa da thung da ka sorkar kawa pait da u Pravin Bakshi, IAS Secretary yong ka chnat i chait i khiah.