Ka JSU seiñbei ynne ka 24 tarik hadien wa da ye ko wow chong ya ka yalang ka EC, da chim ko ya i rai heiyatoh waka ILP, u pyrchah yaka CAA wei wow dawa naka sorkar jylla wow wanrah wow pynman lang yaka 39th National Games ha Ri-loom Jaiñtia.
Ka seiñ da dawa ko na ka sorkar jylla wow chimkhia wow yaklam smat waka sorkar pyrdi yow pynman aiñ noh syndon yaka ILP hapoh ka jylla iwa da sahkut kattu da jan chi snem nadooh wa chim yaka rai hapoh ka dorbar chna aiñ ka jylla.
Ka seiñ JSU seiñbei da kyrpaad ko ya waroh wow ya tylli yow pynmankaam yaka ILP wei ka seiñ da dawa ko leh na ka sorkar pyrdi wow pynlait ya ka jylla waroh kawi na ka aiñ CAA neidaw wa kamwa man kattæ ym toh waroh kawi ka jylla kawa haap hapoh ka 6th Schedule.
Heiyatoh waka National Games ka seiñ da ong ko wa ym em pynman yaka ha Ri-loom Jaiñtia wei ini da ktah bha ko yaki khynroo khyllood ka thaaiñ neibhah wa boon kiwa chong chnong da angnood ki wow yoo ya ka National Games hapoh Ri-loom Jaiñtia wei daw yachem wa u CM yow pynsñiaw ya ini.
