Jowai: Ka seiñ Jaintia Students’ Union (JSU) ynnin ka 17 tarik da lai yachem ko wa u Superintendent Engineer Commercial ka MeECL ha Lumjingshai, Shillong. Ha i yachem ka seiñ wa uni u sahep wa pait yaka bai bordiñ, da dawa ki na kiwa saam bai bordiñ yong ka MeECL wa toh u wan e bai bordiñ ki man u bnai khlem da pynsahteiñ da kiwa boon bnai ya ka bai bordiñ cha kiwa chnong cha nongkyndong yong ka thaaiñ Jaiñtia khamtam ha ka thaaiñ Amlarem Sub-Division neidaw wa kiwa chong chnong chem chitom ki wow su ya ka bai bordiñ chisien su ya iwa sah da kiwa boon bnai.
Ki paidbah ka thaaiñ ki da ujor ki cha ka seiñ hajrong i kheiñ stiñ ka chnat MeECL neidaw wa ki wakreh ym jooh wan chim wei ym jooh wan pait ki ya ka Meter Reading man u bnai wei da boohteiñ ki wow leh ya ini hadien 4 næ 5 bnai wei ini booh ko yei eh ya kiwa chong chnong kiwa duna ka kamai kajih wow su ya ka bai bordiñ kawa poi da ki hajar tyngka chi sien su ha i jooh i por.
Ka seiñ leh da kyrpaad ko ya ka MeECL wa ya ki bai bordiñ kiwa da sah slem kiwa ym pu dep wow su lut da kiwa chong chnong ha ki snem kiwa da dep wow chah ya ki wow su ki khajik chisien (Quarterly Instalment) ym toh wow su chisien su neibhah kani ktah ko ya i su ya kiwa duna i yoh i kot ha ki chnong nongkyndong.
Ka seiñ leh da kyrpaad ko wa lada ye wow maap ya ki kattu katni ki bai bordiñ warim neidaw wa em ki por wa ki meter da dooh noh næ wa da rim ki wei ym em krehkaam chooh wei ka seiñ leh da dawa ko wa ki meter warim waroh toh u booh noh da kiwa thymme neidaw kani daw pynsuk ko ya i pynemkaam ya i bordiñ yow man leh i bai bordiñ kawa bait wa kawa che.
Neiliang ka MeECL leh da mynjur ko wow pait bniah ya ki bai bordiñ warim lada toh u pynduna namo wow e laad wow su ki khajik chisien ha ka chi snem yow pynkhooid ya ki bai bordiñ kiwa dang sah ha ki snem kiwa da dep.
Discussion about this post